Aydın Hüseynov: “Sonrakı dövrdə bunun həcmi daha böyük olacaq”
“Azərbaycanla Türkiyə arasında ticarət dövriyyəsinin həcmi 2,5 milyard dollardır”. Bunu Azərbaycanın Türkiyədəki yeni səfiri Xəzər İbrahim “Daily Sabah” nəşrinə müsahibəsində deyib.
Türkiyə ilə Azərbaycan arasında mədəniyyət və turizm sahəsində əməkdaşlığın mövcud potensialı tam əks etdirmədiyini vurğulayan səfir deyib ki, Azərbaycandan Türkiyəyə gedənlərin sayı çox olsa da, Türkiyədən Azərbaycana gələnlərin sayı azdır: “Biz Türkiyə vətəndaşlarının Azərbaycana gəlməsi və Azərbaycan musiqisi, mədəniyyəti və tarixindən zövq almaları üçün çox şeylər etməliyik”.
Səfir bildirib ki, iki ölkə arasında iqtisadi əlaqələr və qarşılıqlı ticarət dövriyyəsi gözləntilərə cavab vermir: “Azərbaycanla Türkiyə arasında ticarət dövriyyəsinin həcmi 2,5 milyard dollardır. Əsas hədəfimiz tez bir zamanda bu rəqəmin 5 milyard dollara çatdırılmasını təmin etməkdir”.
Məlumat üçün qeyd edək ki, 2000-ci ildə Azərbaycan və Türkiyə arasında xarici ticarət dövriyyəsinin həcmi 326 milyon dollar təşkil edib. 2006-ci ildə isə bu rəqəm 1 milyard 35 milyon dollara çatıb.
Xarici ticarət dövriyyəsi 2013-cü ildə 3 milyard 300 milyon dollara çatıb. Neftin ucuzlaşması səbəbindən ticarət dövriyyəsində müəyyən azalma olub. 2016-ci ildə bu rəqəm 1 milyard 600 milyon dollar olub. Ancaq ötən il ticarət dövriyyəsi artmağa başlayıb. Hesablamalara görə, Azərbaycanın Türkiyəyə investisiyalarının həcmi bu il təxminən 20 milyard dollara çatacaq. Mövcud iqtisadi layihələr əsasında hazırda 40 min Türkiyə vətəndaşı Azərbaycanın qardaş ölkədəki layihələrində çalışır.
Bütün bu deyilənlərin fonunda, tez bir zamanda iki ölkə arasında ticarət dövriyyəsinin 5 milyarda çatdırılması nə dərəcədə mümkündür?
Sözügedən məsələ ilə bağlı fikirlərini “Bakı-Xəbər”lə bölüşən millət vəkili Aydın Hüseynovun sözlərinə görə, Türkiyə və Azərbaycan arasında ticarət dövriyyəsini 5 milyard dollara çatdırmaq mümkündür. O bunu bir sıra faktorlarla əsaslandırdı: “Məsələ ondadır ki, Bakı-Tiflis-Qars dəmir yolu açıldığı üçün bu, Türkiyə ilə Azərbaycan arasında iqtisadi əlaqələrə önəmli təkan verəcək. Daşınmaların sayı bu il daha da artacaq. Bu da iki ölkə arasında ticarət dövriyyəsinin artmasına ciddi təkan verəcək. Nəzərə almaq lazımdır ki, dəmir yolu ucuz olduğuna görə nəqliyyat xərclərinin azalmasına öz təsirini göstərir. O üzdən bu, ticarət üçün daha sərfəli və cəlbedicidir. Ona görə də iş adamları yaranan bu fürsətdən maksimum istifadə etməyə çalışacaqlar və nəticədə ticarət dövriyyəsi artacaq. Yəni iqtisadi əlaqələri genişləndirməyə cəhd edəcəklər və bu da öz müsbət nəticəsini verəcək. Başqa bir tərəfdən, TANAP layihəsinin bu il istismara veriləcəyi gözlənir. Bunun sayəsində Azərbaycan qazının Türkiyəyə çatdırılması prosesində növbəti mərhələ başlayacaq. Bu amilin özü iki ölkə arasında ticarət dövriyyəsinin artmasına mühüm təsir göstərəcək. Eləcə də iki ölkə arasında digər sahələri götürdükdə görürük ki, doğrudan da perspektivdə Türkiyə ilə Azərbaycan arasında ticarət dövriyyəsi daha da genişlənəcək. İlkin olaraq bunun 5 milyard dollar ətrafında olacağı proqnozlaşdırılır. Sonrakı dövrdə ticarət dövriyyəsinin həcmi daha böyük olacaq. Çünki həm Azərbaycanda, həm də Türkiyədə bunun üçün böyük potensial var”.
Vidadi ORDAHALLI
