Qadir Bayramlı: "İtaliya kimi ölkələrlə əməkdaşlıq etmək Azərbaycana yeni texnologiya bəxş edə bilər"
Son illər ölkəmizdə aparılan islahatlar nəticəsində əhəmiyyətli sosial-iqtisadi dəyişikliklər baş verib, sahibkarlıq fəaliyyəti üçün əlverişli iqtisadi mühit formalaşıb. Bəllidir ki, Azərbaycanda fındıqçılıq sahəsi artıq inkişaf edir. Xarici şirkətlər də Azərbaycanda fındıqçılığın inkişafına maraq göstərir.
İtaliyanın məşhur "Ferrero" şirkəti Azərbaycanda fındıqçılığın inkişafına dəstək göstərə bilər. Bu məsələ şirkət nümayəndələri ilə Azərbaycanın kənd təsərrüfatı naziri Heydər Əsədov arasında keçirilən görüş zamanı müzakirə olunub.
Nazir Heydər Əsədov "Ferrero" şirkətinin aqrobiznes koordinatoru Daniel Dellaça ilə görüşüb. Görüşdə çıxış edən H.Əsədov qeyd edib ki, ölkəmizdə fındıqçılığın inkişafı üçün böyük potensial var, fermer və sahibkarlar ən çox valyuta gətirən strateji məhsullar arasında olan fındığın becərilməsinə, fındıq bağlarının salınmasına böyük maraq göstərirlər: "Fındıq istehsalı kənd təsərrüfatının inkişafında önəmli rol oynayır. Bununla yanaşı, məhsulun artırılması məqsədilə dövlət tərəfindən fındıq istehsalçılarına güzəştli kreditlər verilir, fındıq pöhrələri alınaraq fermerlərə pulsuz paylanır. Bu isə yeni bağların salınmasına, fındıq istehsalının daha da artırılmasına geniş imkanlar açır".
"Ferrero" şirkətinin aqrobiznes koordinatoru D.Dellaça təmsil etdiyi şirkətin Azərbaycanda fındıqçılığın inkişafına önəm verdiyini və bu sahədə əməkdaşlığın daha da genişlənməsi üçün öz səylərini əsirgəməyəcəyini bildirib.
Məsələ ilə bağlı fikir bildirən Azərbaycan Dövlət İqtisad Universitetinin dosenti Qadir Bayramlı "Bakı-Xəbər"ə açıqlamasında qeyd etdi ki, fındıqçılıq Azərbaycanda az tənəzzülə uğrayan və inkişaf edən sahələrdən biridir. Ötən il Azərbaycan fındıqçıları üçün uğurlu il oldu: "Bəllidir ki, dünyanın əksər ölkələrində iqlim şəraiti ilə əlaqədar fındıq istehsalı az oldu. Ancaq Azərbaycanda isə yüksək nəticə oldu".
Həmsöhbətimiz hesab edir ki, fındıqçılığın inkişafı ilə bağlı İtaliya təcrübəsinin öyrənilməsində böyük fayda var: "Azərbaycanda fındıq sahələrinin genişləndirilməsi prosesi gedir. Amma bu, planlı şəkildə olmalıdır ki, fındıqçılığın gələcəyi təminat altında olsun. Həm fındığın alqı-satqısı, həm də qiymətin müəyyən olunması baxımından bəzi məsələlər nəzərə alınmalıdır. Həmçinin, önəmli məsələlərdən biri də fındığın emalı ilə bağlıdır. Bizim fındıq emalı müəssisələrimiz həm yetərincə deyil, həm də texnologiyası inkişaf etməyib. İtaliya kimi ölkələrlə əməkdaşlıq etmək Azərbaycana yeni texnologiya bəxş edə bilər".
Q.Bayramlının sözlərinə görə, fındıqçılıq perspektivli sahələrdən biridir. Bu sahəyə diqqət ayrılarsa, fındıqçılıq işi ilə məşğul olanların maddi vəziyyəti yaxşı olar.
Günel CƏLİLOVA
