Şahin Camalov: "Bunun nə ekoloji, nə də qəzaların önlənməsi baxımından bizə bir şey verəcəyini düşünmürəm"
Azərbaycanda köhnə avtomobillərin ölkəyə gətirilməsinin qarşısını almaq üçün yeni qadağaya ehtiyac var. Bunu mətbuata açıqlamasında avtomobil eksperti Eldəniz Cəfərov təklif edib.
O bunu müxtəlif arqumentlərlə əsaslandırmağa çalışıb. Onun sözlərinə görə, istehsal tarixi 2005-ci ilə qədər olan avtomobillərin ölkəyə gətirilməsinin qadağan edilməsi artıq müsbət təsirini göstərib: "Əvvəllər köhnə, sıradan çıxmış, bir neçə avtomobilin birləşməsi olan avtomobilləri Azərbaycana gətirirdilər. Onlara tam nəzarət mümkün deyildi. Bununla bağlı qadağanın müsbət təsirləri oldu, xüsusilə də ekologiyaya vurulan zərərin böyük bir hissəsi aradan qalxdı".
E.Cəfərov təklif edir ki, artıq istehsal tarixi 2010-cu ilə qədər olan avtomobillərin ölkəyə gətirilməsinə qadağa qoyulsun. Belə olan halda, artıq köhnə avtomobillərin Azərbaycana gətirilməsinin qarşısı alınacaq. Həm fərdi qaydada, həm də distribütorlar ölkəyə yeni avtomobilləri gətirə biləcəklər. Onun fikrincə, yeni qadağanın tətbiqi ilə əlaqədar ölkəyə yeni maşın gətirilməsi üçün bank və sığorta xərclərində güzəştlərin tətbiqi, 20 % ilkin ödənişlə avtokreditlərin bərpa edilməsi məqsədəuyğun olardı: "Yeni avtomobillərə görə verilən avtokreditlərdə ilkin ödənişin aşağı salınması avtomobil bazarında yenidən canlanma yaradacaq. Daha bir güzəşt isə avtokreditlərə görə bankın tutduğu əlavə xərclərin aradan qaldırılması ola bilər". Ölkəyə köhnə avtomobillərin gətirilməsinin qarşısının bu şəkildə alınmasının bütün tərəflər üçün müsbət nəticəsi olacağı deyilir.
Maraqlıdır, bəs digər ekspertlərin bu təklifə münasibəti necədir?
Məsələyə münasibət bildirən ekspert Şahin Camalov isə indiki dövrdə bunu o qədər də məqbul hesab etmir. O bunu müxtəlif amillərlə əlaqələndirdi: "2010-cu ilə qədər istehsal olunan avtomobillər üçün belə bir məhdudiyyətin qoyulmasının hansısa effekt verəcəyini düşünmürəm. Sovet dönəmində istehsal olunan avtomobillərin ölkəyə gətirilməsinin məhdudlaşdırılmasını anlamaq olar, amma 2005-2010 arası istehsal olunan Avropa avtomobillərinə məhdudiyyətin qoyulmasını müsbət addım hesab etmirəm. Bu bizim üçün elə bir şey vəd etmir. Ona görə ki, arada elə böyük ciddi fərq yoxdur. Zatən, avtomobillərin qiyməti son illər xeyli artıb və alıcılıq səviyyəsi də əvvəlki kimi deyil. Digər tərəfdən, bunun nə ekoloji, nə də qəzaların önlənməsi baxımından bizə bir şey verəcəyini düşünmürəm. Bu tip addımlar o vaxt effektli olacaq ki, ölkədə avtomobil vasitələri istehsal olunsun. Daxili istehsalın qorunması baxımından bu hansısa töhfə verərdi. Ancaq indiki dövrdə bunun hansısa fayda verəcəyini düşünmürəm. Avropa ölkələrinin istehsal etdiyi avtomobillər arasında elə bir böyük fərq yoxdur. Əhalinin orta təbəqəsi bu avtomobillərə önəm verir. O baxımdan da bunun məhdudlaşdırılmasını məqsədəuyğun hesab etmirəm".
Vidadi ORDAHALLI
