Əli Əlirzayev: "Özünüməşğulluq proqramının qəbul olunması və göstərilən istiqamətdə aparılan işlər artıq bu sahəyə öz təsirini göstərir"
Azərbaycanda sosial yardım alanların sayı azalıb. Dövlət Statistika Komitəsinin yaydığı məlumata əsasən, cari il iyulun 1-nə ölkədə 120,3 min aztəminatlı ailənin 498,4 min nəfər üzvü ünvanlı dövlət sosial yardımı alıb və onun bir nəfərə düşən orta aylıq məbləği 35,8 manat təşkil edib.
Cari ilin əvvəli ilə müqayisədə ünvanlı dövlət sosial yardımı alanların sayı 10,7 faiz azalıb.
Sosial yardım alanların sayının azalması nə ilə bağlıdır? Mövzu barədə fikir bildirən iqtisadçı-ekspert Əli Əlirzayev "Bakı-Xəbər"ə açıqlamasında qeyd etdi ki, ünvanlı sosial yardım alanların sayının azalması gözlənilən idi: "Çünki son zamanlar özünüməşğulluq proqramının qəbul olunması və bu istiqamətdə aparılan işlər artıq bu sahəyə öz təsirini göstərir. Bəllidir ki, bölgələrdə və ya istənilən yerdə sahəsi olan şəxslərə özünə şərait yaratması üçün imkan yaradılır. Nəticədə əvvəllər ünvanlı sosial yardım alanlar artıq özünüməşğulluq proqramından yararlanırlar. Əslində, özünüməşğulluq proqramı daha yaxşıdır. Çünki bu layihə insanlara özünü təmin etmək və özünü tapmaq şansı verir. Dövlət özünə iş qurmaq istəyən şəxslərə müəyyən dərəcədə yardım edir. Kimə torpaq, kiməsə kredit verir, bir sözlə, ehtiyacı olan insanlara müxtəlif formada yardım edir. Nəticədə o insanların həm özləri qazanır, həm də dövlət".
İqtisadçının sözlərinə görə, aparılan tədbirlər imkan verir ki, insanlar təsərrüfat və ya aqrar sahə ilə məşğul olsunlar.
Həmsöhbətimiz onu da bildirdi ki, ünvanlı sosial yardım alanların sayının azalması səbəblərindən biri də sənədləşmə prosesinin çətin olması ilə bağlıdır: "Artıq bu xidmətdən yararlanmaq istəyənlər sənədləşmə prosesinin çətin olması səbəbindən dolayı bu istəklərindən yan keçməli olurlar".
Günel CƏLİLOVA
