Müslüm İbrahimov: "İnsanların qiymətli kağız bazarına maraq göstərməsinin başlıca səbəbi SOCAR istiqrazlarının dövriyyəyə buraxılmasıdır"
SOCAR istiqrazları qiymətli kağızlar bazarına marağı artırıb. Həmin istiqrazlar qiymətli kağız bazarına daxil olduqdan sonra bu sahədə vəziyyət müsbətə doğru dəyişib. Artıq istiqrazlara maraq artıb. Bunun da səbəbi istiqrazların likvidliyi və şərtlərinin əlverişli olmasıdır. Bakı Fond Birjasının (BFB) Ticarət və Üzvlük Qrupu rəhbəri Rəxşəndə Əlili media nümayəndələrinə açıqlamasında deyib ki, hazırda yerli qiymətli kağızlar bazarında belə likvid alətlərin olması sevindirici haldır. SOCAR istiqrazlarının abunə yazılışı zamanı ümumi təklif həcmindən təxminən 2 dəfə çox tələb yığıldı. Bu fakt özlüyündə SOCAR istiqrazları ilə təkrar bazar əməliyyatlarının aktiv olacağına işarə idi.
BFB-nin nümayəndəsi onu da qeyd edib ki, hazırda istiqrazlara olan tələb istiqrazların əlverişli şərtləri ilə yanaşı, SOCAR-a inamın da göstəricisidir.
Qiymətli kağız bazarına marağın artması barədə danışan iqtisad elmlər doktoru Müslüm İbrahimov "Bakı-Xəbər"ə açıqlamasında bunları qeyd etdi: "Qiymətli kağız bazarına marağın artmasının bir neçə səbəbi var. İlk öncə deyim ki, investisiya alətlərinin sayının artması bu sahəyə öz təsirini göstərdi. Bəllidir ki, əvvəllər bank sistemi və ya real iqtisadiyyatın hansısa sahəsinə yığımlar qoyulurdu. Hər bir istehlakçının yığımı var. Və bu yığımı düzgün istifadə etmək üçün investisiya aləti axtarılır. Aydındır ki, real iqtisadiyyata böyük həcmli investisiya lazımdır. Ancaq qiymətli kağız isə portfel investisiyası sayılır. Bir çox insanlar öz yığımlarını qiymətli kağıza yatıra bilər. Bu az miqdarda investisiya tələb edir. İnsanların bu növ yığım sayılan qiymətli kağıza marağı artıb".
Həmsöhbətimizin sözlərinə görə, bəzi şəxslər gəlirini bank depozitində saxlamağa üstünlük verir: "Bu hal daha çox devalvasiya baş verməmişdən öncə daha çox müşahidə olunurdu. Sonra isə manatın məzənnəsinin xarici valyutaya nisbətən dəyişməsi bank sisteminə inamı zəiflətdi. Belə olan halda, əhali digər sahələrə meyl göstərdi. Onlar əllərində olan vəsaiti digər sahələrdə saxlamaq qərarına gəldilər. Beləliklə, əhali yığımlarından vəsait itirməmək üçün qiymətli kağız bazarına maraq göstərdi. İnsanların qiymətli kağız bazarına maraq göstərməsinin başlıca səbəbi SOCAR istiqrazlarının dövriyyə buraxılmasıdır. SOCAR istiqrazlarına tək Azərbaycanda yox, regionda böyük maraq var".
Həmsöhbətimiz onu da bildirdi ki, bəzi şəxslər vəsaitini dollarda saxlamağa investisiya aləti kimi baxır: "İnsanlar fikirləşirlər ki, gəlirini dollarda saxlamaqla əldə olunan vəsaitinin dəyərini saxlaya biləcəklər. Ümumiyyətlə, insanlar yığımlarını ya bank sektoruna, ya daşınmaz əmlaka, qiymətli əşyalara, ya xarici valyutaya, ya da qiymətli kağızlara yatırır.
Qiymətli kağız bazarının inkişaf etməsinin müsbət tərəfi odur ki, əhalinin gəlir dərəcəsi yüksək olur".
Günel CƏLİLOVA
