Zakir Əhmədov: "Bunun nəticəsində Azərbaycanın kənd təsərrüfatı məhsullarının ixracından əldə etdiyi gəlirlər artacaq"
Məlumata görə, Qazaxıstan Azərbaycanın mənafeyi naminə bəzi kənd təsərrüfatı mallarının ixracından imtina edəcək. Sözügedən ölkə bir dəfə bənzər addım atmışdı. Avrasiya İqtisadi İttifaqının üzvü olmağına rəğmən, "Azersun" şirkətinin istehsal etdiyi məhsullar üçün azad gömrüksüz şərait yaratmışdı. Baxmayaraq ki, Ermənistan Aİİ-nin üzvüdür, amma buna mane ola bilmədi.
Ümumilikdə, Qazaxıstanla Azərbaycan arasında münasibətlər həmişə yüksək səviyyədə olub. Zaman-zaman müəyyən problemlərin həllində həm Qazaxıstan Azərbaycana, həm də Azərbaycan Qazaxıstana kömək edib. Dövlət başçılarımız mütəmadi olaraq qarşılıqlı səfərlər ediblər və bir sıra məsələlərin həllində razılığa gəliblər. Qazaxıstan Azərbaycanın ərazi bütövlüyünü dəstəkləyən bir dövlətdir. Hətta Nazarbayev Azərbaycanın iştirak etmədiyi bir sıra beynəlxalq tədbirlərdə Azərbaycanı müdafiə edib.
İkitərəfli əlaqələrə gəlincə, Azərbaycanla Qazaxıstan arasında iqtisadi əlaqələr daha da genişləndirilə bilər. Ona görə ki, hər iki ölkənin bununla bağlı yetərincə potensialı var. Bu baxımdan Azərbaycan-Qazaxıstan ticarət əlaqələrinin inkişafı ölkələrimiz üçün faydalıdır. Hazırda Qazaxıstanda 120-130 minə yaxın azərbaycanlı yaşayır. Bu baxımdan iqtisadi və siyasi əlaqələrin yüksək səviyyədə olması vacibdir. Qazaxıstanla iqtisadi əməkdaşlıq əsasən dəniz vasitəsilə həyata keçirilə bilər. Çünki iki ölkənin dənizlə əlaqələri var. Həmçinin, nəqliyyat sahəsi, qeyri-neft sektorunda əməkdaşlığın böyük perspektivi var.
Bütövlükdə, Qazaxıstanın Azərbaycanın mənafeyi naminə bəzi kənd təsərrüfatı mallarının ixracından imtina etməsi ölkəmizin kənd təsərrüfatı üçün ümumən hansı şansları yaradacaq?
Məsələyə münasibət bildirən ekspert Zakir Əhmədovun sözlərinə görə, bu həmin sahənin daha da inkişafına təkan verəcək: "Görək söhbət hansı kənd təsərrüfatı məhsullarından gedir? Təbii ki, Qazaxıstan Azərbaycanın mənafeyi naminə hansısa məhsulların ixracından imtina edirsə, bu, bazara daha çox Azərbaycan istehsalı məhsullarının çıxarılması üçün şərait yaradır. Bu imkan verəcək ki, bəzi kənd təsərrüfatı məhsullarının həm istehsalı, həm də ixracı artsın. Çünki bu cür güzəşt bazarda rəqabət mühitini yaxşılaşdırır və ixrac imkanlarının genişlənməsi üçün böyük imkanlar yaradır. Nəticədə Azərbaycanın kənd təsərrüfatı məhsullarının ixracından əldə etdiyi gəlirlər artacaq". Vidadi ORDAHALLI
