Rüfət Quliyev: "Tütünçülüyün inkişafı ilə bağlı imzalanan proqram bu sahənin məqsədyönlü inkişafına səbəb olacaq" Vüqar Bayramov: "Tütünçülüyün inkişafına dövlət dəstəyi bölgələrdə işsizlik probleminin həllində böyük rol oynayacaq"
Prezident İlham Əliyev avqustun 10-da "Azərbaycan Respublikasında tütünçülüyün inkişafına dair 2017-2021-ci illər üçün Dövlət Proqramı"nın təsdiq edilməsi haqqında" Sərəncam imzalayıb.
Sərəncama əsasən, tütünçülüyün inkişaf etdirilməsi, tütün emalı sahəsinin dərinləşdirilməsi, bu sahədə fəaliyyət göstərən emal müəssisələrinin xammala olan tələbatının yerli məhsul istehsalı hesabına təmin olunması, gəlirliliyin və ixrac potensialının artırılması, kənd əhalisinin məşğulluğunun yüksəldilməsi məqsədilə "Azərbaycan Respublikasında tütünçülüyün inkişafına dair 2017-2021-ci illər üçün Dövlət Proqramı" təsdiq edilib.
Tütünçülüyün inkişafına dövlət dəstəyi, xüsusilə də qəbul olunan Dövlət Proqramı bu sahəyə bölgələrdə marağın artmasına səbəb olub.
Məlumat üçün bildirək ki, Prezident İlham Əliyev bu günlərdə
Qax rayonunda müşavirə keçirərkən tütünçülüyün inkişafının vacibliyi barədə nitq söyləmişdi.
Tütünçülüyün inkişafına dair 2017-2021-ci illər üçün Dövlət Proqramının imzalanmasına dair fikir bildirən Milli Məclisin İqtisadi siyasət, sənaye və sahibkarlıq komitəsinin üzvü Rüfət Quliyev "Bakı-Xəbər"ə açıqlamasında qeyd etdi ki, adıçəkilən proqram bu sahənin inkişafının sürətlənməsinə xidmət edəcək: "Dövlət Proqramı tütünçülük sahəsinin inkişaf planını konkretləşdirəcək və çatışmayan infrastrukturu yaratmağa imkan verəcək. Sektor qarşısında 2021-ci ilədək tütün istehsalını ildə 12 min tona çatdırmaq məqsədi qoyulub. Bu göstərici ölkədə tütün məhsullarına tələbatı təmin etməkdən əlavə, həm də tütünü ixrac etməyə də imkan verəcək".
R.Quliyevin sözlərinə görə, Dövlət Proqramında bu sahənin inkişafı üçün bütün amillər nəzərə alınıb: "Toxumların keyfiyyətinə nəzarət və fitosanitariyaya diqqət yetiriləcək. Bu onu göstərir ki, dövlət tütünçülüyün inkişafı üçün hər cür şəraitin yaradılmasına dəstək göstərməyə hazırdır". Millət vəkili onu da vurğuladı ki, tütün sənayesinin inkişafının sosial aspektləri də vacibdir: "Bu gün daxili istehsal tələbatın 16-17 faizini təmin etmək gücündədir. Dövlət Proqramının icrası isə bu göstəricini 60-65 faiz, bəlkə də 70 faizədək artıra bilər".
Həmsöhbətimiz hesab edir ki, tütünün yetişdirilməsi üçün daha əlverişli ərazilər Azərbaycanın şimal-qərb rayonlarıdır: "Bu rayonlarda tütünçülüyün inkişafı üçün əlverişli iqlim şəraiti var. Bundan başqa, bu rayonlarda fermerlərin tütünçülük sahəsində müəyyən təcrübəsi var. Bu sahənin inkişafı və məhsulun keyfiyyətinin artırılması üçün xarici mütəxəssislərə də ehtiyac var".
R.Quliyev onu da vurğuladı ki, tütünçülüyün inkişafı ilə bağlı imzalanan proqram bu sahənin məqsədyönlü inkişafına səbəb olacaq. Tütünçülüyün inkişafı ilə bağlı dövlət tərəfindən istənilən qədər şərait yaradılıb.
İqtisadçı-ekspert Vüqar Bayramovun sözlərinə görə, tütünçülüyün inkişafına dövlət dəstəyi, xüsusilə də qəbul olunan Dövlət Proqramı bu sahəyə bölgələrdə marağın artmasına səbəb olub. Bir sıra rayonlarda tütün sahələrinin həcmi öncəki illə müqayisədə artıb. Bu sahənin inkişafı yüz milyonlarla dolların ölkədə qalmasına gətirib çıxaracaq.
Dövlət başçısının tütünçülüyün inkişafına dair 2017-2021-ci illər üçün Dövlət Proqramı ilə bağlı imzaladığı sərəncam bu sahənin sistemli inkişafına böyük imkanlar yaradıb: "Belə ki, sovet dövründə 18 min hektarda əkilən tütün sahələri indi cəmi 2.4 min hektar təşkil edir. Halbuki, bu sahədə əkin və istehsalı dəfələrlə artırmaq imkanı var. Tütün və tütün məmlulatlarının böyük qismi xaricdən gətirilir və buna görə yüz milyonlarla dollar vəsait ölkədən kənara çıxır. Yeni proqram bu vəsaitlərin ölkədə qalmasına səbəb olacaq. Tütünçülüyün inkişafına dövlət dəstəyi bölgələrdə işsizlik probleminin həllində böyük rol oynayacaq.
Azərbaycanda tütünçülüyün ən çox inkişaf etdiyi yerlərdən biri olan Şəkidə də bu sahəyə maraq getdikcə artır. Sahibkarlar bildirir ki, dövlətin dəstəyi onlara tütün sahələrini genişləndirmək üçün başlıca stimuldur.
Onu da qeyd edək ki, tütünçülük əsasən şimal-qərb bölgəsində inkişaf edib. Dövlət başçısının müşavirəni məhz bu bölgədə keçirməsi də təsadüfi deyildi. Dövlət Proqramının icrası nəticəsində Azərbaycanda nəinki tütünə daxili tələbatı tam ödəmək, eyni zamanda xarici ölkələrə yüksək keyfiyyətdə tütün məmulatları ixrac etməklə ölkəyə valyuta axınını təmin etmək planlaşdırılır".
Günel CƏLİLOVA
