Könül Nuriyeva: "... qeyri-neft sektorunda yaşanacaq inkişafla bağlıdır"
Dünya Bankı 2018-ci ildə Azərbaycan iqtisadiyyatının 0,5-1 faiz artacağını proqnozlaşdırır. Bunu bankın Bakı Ofisinin rəhbəri Navid Hassan Naqvi deyib. Onun sözlərinə görə, bu il bank ölkə iqtisadiyyatının 1-1,5 faiz azalacağını gözləyir:
"Təəssüf ki, Azərbaycan iqtisadiyyatı neft sektorundan həddən çox asılıdır. Amma enerji resurslarının qiymətinin aşağı düşməsi və bunun ardınca milli valyutanın devalvasiyası digər sektorların inkişafı üçün imkan yaradıb. Hazırkı mübadilə məzənnəsi bir çox potensial aqroməhsul ixracatçılarına ixracatı müxtəlif bazarlarda daha rəqabətqabiliyyətli qiymətlərlə reallaşdırmağa imkan verəcək".
Naqvi bildirib ki, neftin qiymətinin düşməsi dövlətin gəlirlərinin azalması deməkdir və bu, ölkə iqtisadiyyatını diversifikasiya etməyə imkan verəcək islahatlar barədə düşünməyə vadar edir: "Təbii ki, Azərbaycan hökuməti dünya iqtisadiyyatında vəziyyəti əsas tutaraq, müxtəlif islahatlar üzərində işləməyə davam edir. Bu baxımdan biz 2016-cı ilin sonunda - 2017-ci ilin əvvəlində dərc olunan strateji yol xəritələrinin qəbul olunmasını alqışlayırıq".
Qeyd edək ki, Azərbaycan Dünya Bankı qrupuna 1992-ci ildə qoşulub.
Məsələ barədə fikir bildirən iqtisadçı Könül Nuriyeva "Bakı-Xəbər"ə açıqlamasında qeyd etdi ki, bəzən elə hal olur ki, səslənən proqnoz özünü doğrultmur. Yəni iddia olunan rəqəmdən daha artıq artım qeydə alınır: "Dünya Bankının Bakı ofisi rəhbərinin Azərbaycan iqtisadiyyatında 1 faiz artımın olacağı barədə proqnozu qeyri-neft sektorunda yaşanacaq inkişafla bağlıdır. Bəllidir ki, son zamanlar ölkədə enerji resurslarında qiymətin aşağı düşməsi, manatın məzənnəsinin xarici valyutaya nisbətən dəyişməsi qeydə alınıb. Kənd təsərrüfatının inkişaf etdirilməsi Azərbaycan iqtisadiyyatının üzərinə düşən əsas işlərdən biridir. Aqrar sahənin inkişafı Azərbaycanın ənənəvi sahələrindən biridir. Ancaq neft gəlirlərinin stabil olduğu dövrdə aqrar sahə bir az arxa plana çəkilmişdi. Ancaq son illər Prezident İlham Əliyevin kənd təsərrüfatı sahəsinin inkişafı ilə bağlı verdiyi tapşırıqlar artıq öz bəhrəsini vermək üzrədir".
Həmsöhbətimizin sözlərinə görə, 2016-cı ilin sonlarında qəbul olunan Strateji Yol Xəritəsindən böyük gözləntilər var.
K.Nuriyevanın fikrincə, görülən işlər öz nəticəsini verərsə, 2018-ci ildə 1 faizlik deyil, daha yüksək rəqəmli artım gözləmək olar.
Günel CƏLİLOVA
