Natiq Cəfərli: "İqtisadi və sosial sahələrin inkişafı üçün kapitala yönəldilən vəsaitin azalmasının əsas səbəbi..."
Azərbaycanda iqtisadi və sosial sahələrin inkişafı üçün əsas kapitala yönəldilmiş vəsait azalıb. 2017-ci ilin yanvar-iyul aylarında Azərbaycanın iqtisadi və sosial sahələrinin inkişafı üçün bütün maliyyə mənbələrindən əsas kapitala 8728,8 milyon manat və ya əvvəlki ilin yanvar-iyul ayları ilə müqayisədə 0,3 faiz az vəsait yönəldilib.
Dövlət Statistika Komitəsinin məlumatına əsasən, vəsaitin 5395,0 milyon manatı neft sektoruna, 3333,8 milyon manatı isə qeyri-neft sektoruna yönəldilib, ümumi sərmayənin 72,5 faizi bilavasitə tikinti-quraşdırma işlərinin yerinə yetirilməsinə sərf edilib. İstifadə olunmuş vəsaitin 79,2 faizi məhsul istehsalı obyektlərinin, 15,6 faizi xidmət sahələri üzrə obyektlərin, 5,2 faizi isə ümumi sahəsi 973,7 min kvadratmetr olan yaşayış evlərinin tikintisinin payına düşür. Daxili mənbələrdən əsas kapitala yönəldilmiş vəsait ümumi sərmayənin 39,5 faizini təşkil edib.
Məsələ ilə bağlı fikir bildirən iqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, iqtisadi və sosial sahələrin inkişafı üçün kapitala yönəldilən vəsaitin azalmasının əsas səbəbi kapital qoyuluşunun azalmasıdır. Son iki ildə bu tendensiya davam edir: "Ötən illə müqayisədə təxminən 40 faizə yaxın kapital qoyuluşunun azalmasının şahidi oluruq. Bu da büdcə gəlirlərinin azalması ilə bağlıdır".
İqtisadçının sözlərinə görə, əsas kapitala qoyulan vəsait dövlət investisiyalarının hesabına həyata keçirilirdi: "Təəssüf ki, indi dövlət investisiyaları azalıb. Və bu azalmanın nəticəsidir ki, əsas kapitala yönələn investisiyalar da azalıb. Acınacaqlı hal odur ki, xarici investorlar tərəfindən gözlənilən nəticə hələ özünü doğrultmur. Neft və qaz sektorundan başqa, xarici investorların marağı hələ də istənilən səviyyədə deyil".
Günel CƏLİLOVA
