Ekspert: “Tütünçülüyün sığorta mexanizmlərinin yaradılması xüsusi yanaşma tələb etmir”
Tütünçülüyün inkişafına dair 2017-2021-ci illər üçün Dövlət proqramı bu sahənin inkişafının sürətlənməsinə xidmət edəcək. Bunu Trend-ə Milli Məclisin iqtisadi siyasət, sənaye və sahibkarlıq komitəsinin üzvü Rüfət Quliyev deyib.
Onun sözlərinə görə, dövlət proqramı bu sahənin inkişaf planını konkretləşdirəcək və çatışmayan infrastrukturu yaratmağa imkan verəcək: “Sektor qarşısında 2021-ci ilədək tütün istehsalını ildə 12 min tona çatdırmaq məqsədi qoyulub. Bu göstərici ölkədə tütün məhsullarına olan tələbatı təmin etməkdən əlavə, həm də tütünü ixrac etməyə də imkan verəcək”.
Deputat qeyd edib ki, dövlət proqramında bu sahənin inkişafı üçün bütün amillər nəzərə alınıb – toxumların keyfiyyətinə nəzarət və fitosanitariya: "Bu onu göstərir ki, dövlət tütünçülüyün inkişafı üçün hər cür şəraitin yaradılmasına və dəstək göstərməyə hazırdır. Burada həmçinin, tütün sənayesinin inkişafının sosial aspektləri də vacibdir. Bu gün daxili istehsal tələbatın 16-17 faizini təmin etmək gücündədir. Dövlət proqramının icrası isə bu göstəricini 60-65 faiz, bəlkə də 70 faizədək artıra bilər”.
R.Quliyev əlavə edib ki, tütünün yetişdirilməsi üçün daha əlverişli ərazilər Azərbaycanın şimal-qərb rayonlarıdır: “Bu rayonlarda tütünçülüyün inkişafı üçün əlverişli iqlim şərtləri var. Bundan başqa, bu rayonlarda fermerlərin tütünçülük sahəsində müəyyən təcrübələri var. Bu sahənin inkişafı və məhsulun keyfiyyətinin artırılması üçün xarici mütəxəssislərə də ehtiyac var”.
Tütünçülük kənd təsərrüfatının sahələrindən biridir, ona görə də bu sahədə sığorta şərtləri və müqavilələr digər kənd təsərrüfatı sahələrinin sığorta müqavilələrindən kəskin fərqlənməyəcək. Bunu isə sığorta sahəsində ekspert Xəyal Məmmədxanlı deyib.
Onun sözlərinə görə, tütünlə bağlı kənd təsərrüfatı sığortası mexanizmlərinin tətbiq edilməsi mümkündür: “Sığorta barəsində tütün əlavə yanaşma tələb etmir – məhsuldarlıq hesablanır, risklər müəyyən edilir və sığörta müqaviləsi imzalanır. Bu çox sadə mexanizmdir və xüsusi yanaşma tələb etmir”.
Ekspert onu da qeyd edib ki, kənd təsərrüfatı sığortasının əsas problemi fermerlərin bu barədə məlumatsızlığıdır: "Kənd təsərrüfatı sığortası fermerlər qarşısında müəyyən şərtlər qoyur və onların yerinə yetirilməməsi şirkət tərəfindən sığorta ödəmələrinin həyata keçirilməməsinə səbəb ola bilər".
