Fikrət Yusifov: "Bu istiqamətdə görülən işlər və sahibkarlığa yaradılan münbit şərait öz nəticələrini verməli idi"
Bu ilin yanvar-iyul ayları ərzində Azərbaycanda sənayenin qeyri-neft sektorunda istehsalı 4,6 faiz artıb. Dövlət Statistika Komitəsinin yaydığı məlumata əsasən, sənayenin qeyri-neft sektorunda məhsul istehsalı 4,6 faiz artıb, neft sektorunda isə 7,1 faiz azalıb.
Sənaye məhsulunun 70,0 %-i mədənçıxarma sektorunda, 24,8 %-i emal sektorunda, 4,4 %-i elektrik enerjisi, qaz və buxar istehsalı, bölüşdürülməsi və təchizatı sektorunda, 0,8 %-i isə su təchizatı, tullantıların təmizlənməsi və emalı sektorunda istehsal olunub.
Mədənçıxarma sektorunda neft hasilatı 8,9 %, əmtəəlik qaz hasilatı isə 1,3 % azalıb.
Emal sektorunda qida məhsullarının istehsalı 2,3 %, içkilərin istehsalı 30 %, toxuculuq sənayesi məhsullarının istehsalı 98,5 %, geyim istehsalı 49 %, ağacın emalı və ağacdan məmulatların istehsalı 83,3 %, kağız və karton istehsalı 0,7 %, kimya sənayesi məhsullarının istehsalı 20,3 %, əczaçılıq məhsullarının istehsalı 2,2 dəfə artıb. Bundan əlavə, DSK rezin və plastik kütlə məmulatları istehsalının 57,3 %, tikinti materialları istehsalının 38,3 %, kompyuter və elektron məhsulları istehsalının 57,6 %, elektrik avadanlıqları istehsalının 69,0 %, maşın və avadanlıqlar istehsalının 19,1 %, sair nəqliyyat vasitələri istehsalının 19,3 %, mebel istehsalının 26,1 % artdığını elan edib.
Azərbaycanda sənayenin qeyri-neft sektorunda istehsalın artması barədə fikir bildirən iqtisad elmləri doktoru, professor Fikrət Yusifov "Bakı-Xəbər"ə açıqlamasında qeyd etdi ki, 2015-ci ilin sonlarından etibarən ölkədə real sektorun inkişafı istiqamətində hökumət tərəfindən zəruri sayılacaq bütün qərarlar qəbul olunub. Azad sahibkarlığın inkişafı istiqamətində çox ciddi adımlar atılıb: "Sahibkarlığın inkişafına mane ola biləcək və mane olan bütün məqamlar aradan qaldırıldı. Bura gömrük islahatları, vergi güzəştlərinin tətbiqi daxildir və bir çox qərarların qəbulu real sektorun qarşısında geniş fəaliyyət meydanı aça bildi".
Həmsöhbətimizin sözlərinə görə, son zamanlar sənayenin qeyri-neft sektorunun inkişafı istiqamətində ciddi addımlar atılıb: "Mingəçevirdə toxuculuq kombinatının yaradılması yüngül sənayenin inkişafı istiqamətində dönüş yaradacaq. Sumqayıtda Neft-Kimya Kompleksinin tikilməsi nəticəsində Azərbaycan tək xam neft ixracı ilə deyil, eyni zamanda neftdən hazırlanan çeşidli məhsulların ixracı ilə məşğul olacaq. Bu istiqamətdə görülən işlər və sahibkarlığa yaradılan münbit şərait öz nəticələrini verməli idi. Məlumat üçün bildirim ki, ötən il də sənayenin qeyri-neft sektorunda artım templəri qeydə alınmışdı. Hesab edirəm ki, ilin sonuna kimi sənayenin qeyri-neft sektorunda da yaxşı göstəricilərin şahidi olacağıq".
Günel CƏLİLOVA
