Vüqar Bayramov: "Bankların sərfəli maliyyə resurslarına çıxış imkanları təmin edilməlidir"
Xarici valyuta risqləri və zəif əməliyyat mühiti Azərbaycanın bank sektorunun inkişafına maneə yaradan əsas amillər olaraq qalır. Bu barədə "Moody's" beynəlxalq reytinq agentliyinin açıqladığı hesabatda deyilir. Hesabatın müəllifi olan "Moody`s"ın vitse-prezidentinin köməkçisi Mariya Malyukova bildirir ki, ümumdaxili məhsul istehsalının və kreditlərə tələbatın azalması, inflyasiyanın sürətlənməsi bu il də bankların kreditləşməsinə əngəl törətməkdə davam edəcək.
"Moody's"ın proqnozuna əsasən, bu il Azərbaycanda ümumdaxili məhsul istehsalı 1 % azalacaq, 2018-ci ildə isə artacaq.
"Aktivlərin keyfiyyətinin zəif olması bankların rentabelliyinə və kapitallaşmasına neqativ təsir edir. 2016-cı ilin sonunda bank sektorunun kredit portfelinin 30 %-i problemlidir. Halbuki, 2015-ci ildə bu göstərici 16 % olub. Bu il də problemli kreditlərin ümumi portfeldə çəkisi yüksək olaraq qalacaq. Buna səbəb qeyri-qənaətbəxş bazar şəraitinin olmasıdır", - deyə M.Malyukova qeyd edib.
Mütəxəssis əlavə edib ki, banklar tərəfindən yaradılan ehtiyatlar itkilərin örtülməsi üçün kifayət etmir.
"Moody's" hesab edir ki, bir çox banklar bu ili də zərərlə başa vuracaq: "Kredit itkiləri və valyuta risqləri bankların kapitalına təzyiq göstərməkdə davam edəcək".
M.Malyukova hesab edir ki, tənzimləyici qurum olan Maliyyə Bazarlarına Nəzarət Palatası (MBNP) bankların əlavə kapitallaşmasını tələb edə bilər.
Qeyd edək ki, hazırda tənzimləyicinin bankların məcmu kapitalına dair minimal tələbi 50 mln. manat səviyyəsində müəyyənləşib.
Ümumilikdə, eksperlərin sözügedən hesabatda səslənən fikirlərə münasibəti necədir?
Məsələyə münasibət bildirən iqtisadçı-ekspert Vüqar Bayramovun sözlərinə görə, hesabatda səslənən fikirlərdə müəyyən həqiqət var: "Məsələ ondadır ki, yaşanan iki devalvasiya bank sektorunun fəaliyyətinə təsirsiz ötüşmədi. Bu səbəbdən bir sıra banklar fəaliyyətini dayandırmalı oldu. Bankların kredit təklifi azaldı, şərtlər çətinləşdi. Bu da, öz növbəsində, müştərilər arasında banklara inamı aşağı saldı. Bütün bunlar, təbii ki, bank sektoruna mənfi təsir göstərdi. Bu gün bank sektorunda yaşanan əsas problemlərdən biri də problemli kreditlərdir. Təəssüflər olsun ki, problemli kreditlərin çəkisi artmaqdadır. Hesab edirəm ki, hazırkı şəraitdə banklar arasında rəqabət artmalıdır. Ən başlıcası, bankların sərfəli maliyyə resurslarına çıxış imkanları təmin edilməlidir. O zaman sadalanan problemlər də azalacaq".
Vidadi ORDAHALLI
