Ruslan Atakişiyev: "Manatın iki dəfə devalvasiyası və iqtisadiyyatda müəyyən durğunluq bank sisteminə çox pis təsir göstərir"
Bu ilin birinci rübündə banklar tərəfindən müştərilərə 15,034.0 milyon manat kredit verilib. Maliyyə Bazarlarına Nəzarət Palatasının yaydığı məlumata əsasən, kreditlər üzrə mümkün zərərlərin ödənilməsi üçün məqsədli ehtiyat 1,747.4 milyon manat olub. Hansı ki, 31 mart tarixinə bu rəqəm 1,726,5 milyon manat təşkil edirdi.
Qeyd edək ki, martın 30-u ilə müqayisədə müştərilərə verilən kreditlər 19,1 milyon manat azalıb. Bu ilin fevralında isə kreditlərin ümumi məbləği 15.395.9 milyon manat olub. Ümumiyyətlə, ilin əvvəlindən müştərilərə verilən kreditlərin həcmi 904,3 milyon manat və yaxud 5,67 % azalıb.
Bank kreditlərinin həcminin azalması barədə fikir bildirən iqtisadçı-ekspert Ruslan Atakişiyev "Bakı-Xəbər"ə açıqlamasında bunları qeyd etdi: "Bank kreditlərinin azalmasının müxtəlif səbəbləri var. 2015-ci ilin sonlarından etibarən bank sektorunda yaşanan vəziyyət bu sahəyə öz təsirini göstərib. Yaşanan devalvasiyalar bank sektoruna ciddi şəkildə təsir edib. Bəllidir ki, bankların əsas gəlir mənbəyi insanlardan yığdıqları əmanətləri, depozitləri sonradan kreditə çevirmək və onlardan gələn gəlirlərdir. Son zamanlar bu az olduğu üçün, bank sisteminə öz təsirin göstərir".
Həmsöhbətimizin sözlərinə görə, bankların verdiyi kredit məbləği xeyli azalıb. Kredit aktivləri 70 faiz təşkil edirdisə, artıq bu aktivlər 50 faizə enib. Yəni kredit portfelləri çox az olduğu üçün, kreditlər də az verilir. Bu da bank sektorunun 2016-cı ildəki gəlirlərinə çox ciddi təsir göstərdi: "Manatın iki dəfə devalvasiyası və iqtisadiyyatda müəyyən durğunluq bank sisteminə çox pis təsir göstərir. Həmçinin, geri qaytarılmayan problemli kreditlərin həcminin günü-gündən artması bu sahəyə öz təsirini göstərir. Maliyyə Bazarlarına Nəzarət Palatası bankların sağlamlaşdırılması üçün müəyyən tədbirlər həyata keçirir. Bu səbəblərə görə də indi banklar kredit verməkdə müəyyən qədər ehtiyatlı davranır.
Kreditlərin aktivlərdə payının kəskin düşməsinin səbəbləri ümumi gedən iqtisadi proseslər, real sektora vəsaitin qoyulmaması və ciddi inkişaf etməməsidir. Kredit aktivlərində payın kəskin düşməsinin günahı yalnız banklarda deyil. İqtisadiyyatda müəyyən zəifləmələrin olması bu sahəyə ciddi təsir edir".
Günel CƏLİLOVA
