Nüsrət İbrahimov: "Aylıq ödənişi ödəməkdə çətinlik çəkən şəxslər həmin mənzili geri qaytarır, ya da satışa çıxarır"
"Maliyyə problemi səbəbindən ipoteka ilə aldığı mənzili satışa çıxaranlar, demək olar ki, çox azdır"
İpoteka ilə alınan mənzillərin bir qisminin geri qaytarıldığı və ya satışa çıxarıldığı haqqında məlumatlar yayılır. Məlumatlara əsasən, Bakı və Xırdalanda ipoteka krediti ilə alınmış bir sıra mənzillər ya şirkətə geri qaytarılır, ya da satışa çıxarılır. İpoteka ilə alınan mənzillərin geri qaytarılmasına səbəb maddi vəziyyəti çətinləşən ailənin aylıq kredit borcunu qaytara bilməməsidir.
Yaşayışa yeni təhvil verilmiş yaşayış komplekslərinin sakinləri bildirir ki, mənzillər boşalır. Son 2 ayda mənzilindən imtina edənlərin sayı artıb.
Mənzilin tikinti şirkətlərinə qaytarılması zamanı alıcı cərimələnir, MTK-ya dəymiş ziyan və digər məsrəflər alıcıdan tutulur. Mənzilin başqa bir şəxsə satışından əldə edilən vəsaitdən bütün məsrəflər çıxılır, sonra alıcının ötən müddət ərzində MTK-ya və ya banka ödədiyi vəsait qaytarılır.
İpoteka ilə alınan mənzillərin geri qaytarılması və ya satışa çıxarılması barədə fikir bildirən daşınmaz əmlak məsələləri üzrə ekspert Nüsrət İbrahimov "Bakı-Xəbər"ə açıqlamasında qeyd etdi ki, bu hal kütləvi şəkildə baş verməyib: "Bu hal hər zaman olub və olacaq. Birinci dəfə deyil ki, ipoteka ilə alınan mənzil geri qaytarılır. Adətən aylıq ödənişi ödəməkdə çətinlik çəkən şəxslər həmin mənzili geri qaytarır, ya da satışa çıxarır. Bu adi haldır".
Həmsöhbətimizin sözlərinə görə, elə şəxslər var ki, onlar başqa bir əraziyə köçmək üçün ipoteka ilə aldığı mənzili satmalı olur. Bu kimi halların ailənin sosial durumuna heç bir bağlılığı yoxdur: "Ev sahibi bank yolu ilə yaşadığı mənzili satışa çıxarır və özünə yeni bir mənzil alır. Ancaq maliyyə problemi səbəbindən ipoteka ilə aldığı mənzili satışa çıxaranlar, demək olar ki, çox azdır".
Günel CƏLİLOVA
