İldırım Qurbanov: "Ölkənin iqtisadi inkişafı daha sürətli mərhələyə keçəcək"
2017-ci ildə Azərbaycanda ÜDM 1,4 % azalacaq, 2018-ci ildə isə 0,6 % artacaq. Bu barədə Dünya Bankının (DB) yenilənmiş proqnozunda deyilir. Sözügedən proqnozda bildirilir ki, bu il resessiyaya bank sistemində baş verən neqativ proseslər, sərt pul-kredit siyasəti və s. amillər səbəb olacaq. Bununla yanaşı, DB Azərbaycan iqtisadiyyatında irəliləyişin baş verdiyini də qeyd edir.
O da məlumdur ki, neftin ucuzlaşması nəticəsində yaranan vəziyyətlə əlaqədar olaraq Azərbaycan öz iqtisadiyyatının bərpası üçün qeyri-neft sektorunun inkişafını prioritet hesab edir. ÜDM-in təxminən 45 faizini təşkil edən enerji daşıyıcılarından əldə olunmuş gəlirlərin aşağı düşməsi nəticəsində büdcə daxilolmaları, manatın məzənnəsi, xarici valyuta ehtiyatları və ödəniş balansı müəyyən çətinliklərlə üzləşsə də, artıq proseslər müsbətə doğru dəyişir. Baxmayaraq ki, 2015-ci ildə 1,1 faiz artan ÜDM ötən il 3,8 faizədək azalıb.
Bu ilin ilk iki ayında müşahidə olunan 0,4 faiz artım iqtisadiyyatın canlanması ilə bağlı ümidləri dirçəldib. Başqa bir tərəfdən, bir müddət əvvəl Bakıda keçirilən "Moody`s" sammiti tədbirində agentliyin kiçik vitse-prezidenti Pyotr Paklin Azərbaycan iqtisadiyyatı ilə bağlı nikbin fikirlər səsləndirib. O deyib ki, neftin bahalaşması iqtisadiyyatın bərpasını sürətləndirəcək: "Neftin 1 barrelinin qiyməti 50 dollardan çox olduğu halda, Azərbaycan hökuməti sərt iqtisadi rejimdən imtina edə və dövlət investisiya qoyuluşunu artıra bilər. Bu isə iqtisadiyyatın bərpasını sürətləndirəcək".
Bütün hallarda, görünən odur ki, beynəlxalq qurumların Azərbaycan iqtisadiyyatı ilə bağlı fikirləri nikbindir. Maraqlıdır, bəs ekspertlər buna necə yanaşır?
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert İldırım Qurbanovun sözlərinə görə, deyilənlərin ciddi əsası var: "Neftin ucuzlaşması ilə əlaqədar olaraq 2015-ci ildən iqtisadiyyatda durğunluq özünü göstərməyə başladı. Bank sektoru bu və ya digər dərəcədə çökdü. Ondan sonra dövlət tərəfindən bir sıra tədbirlər görüldü. Həmin tədbirlərin effekt verməsi üçün zaman lazımdır. Ona görə də bu ilin sonuna qədər ÜDM-də azalma müşahidə olunsa da, ondan sonra real artım özünü göstərməyə başlayacaq. 2018-ci ilin artıq birinci rübündə artım tempi müşahidə olunmağa başlayacaq. Ona görə də Azərbaycan iqtisadiyyatı ilə bağlı gələcəyə nikbin baxıram. Yəni ölkənin iqtisadi inkişafı daha sürətli mərhələyə keçəcək. Bir neçə il əvvəl iqtisadiyyatda baş verən müəyyən proseslər bir sınaq idi. Nəzərə almaq lazımdır ki, ölkədə sistemli, hərtərəfli islahatlar gedir. Bu islahatlar kadrlarla işi də əhatə edir. Bütün bunlar gələcəkdə daha effektiv iqtisadi fəaliyyətin təşkilinə zəmin yaradacaq".
Vidadi ORDAHALLI
