Vüqar Bayramov: "İki ölkə arasında ticarət və iqtisadi dövriyyənin genişləndirilməsi imkanları daha böyükdür"
Məlum olduğu kimi, ötən həftə Alman-Azərbaycan Xarici Ticarət Palatası Bavariya əyalətinin İqtisadiyyat, Media, Energetika və Texnologiyalar üzrə Nazirliyinin dövlət katibi Frans Yozef Pşirerin rəhbərliyi altında Bavariya əyalətindən olan müəssisələrin nümayəndə heyətinin Azərbaycana işgüzar səfəri çərçivəsində Bavariya-Azərbaycan Biznes Forumunu təşkil edib.
Forum tikinti, inşaat, şəhərsalma, maşınqayırma və avadanlıq, avtomobil sənayesi, informasiya və kommunikasiya texnologiyaları, ətraf mühit texnologiyaları, peşə təhsili, tibbi xidmət, istehlak malları, turizm sahələrini təmsil edən 120-dən çox Bavariya və Azərbaycan biznes nümayəndələrini bir araya gətirib.
Bavariya-Azərbaycan Biznes Forumunda Alman-Azərbaycan Xarici Ticarət Palatasının (AHK Azərbaycan) icraçı direktoru Tobias Baumann və digərləri çıxış edib. Onlar iki ölkə arasında iqtisadi əlaqələrin vəziyyətinə toxunub. Bildirilib ki, onlar Azərbaycanla iqtisadi-ticari əlaqələrin daha da genişlənməsində, qarşılıqlı informasiya mübadiləsində maraqlıdır.
O da məlum olub ki, ötən 25 ərzində iki ölkə arasında iqtisadi əlaqələr inkişaf edib. Azərbaycanda alman investisiyalı 200 şirkət fəaliyyət göstərir. Ötən müddət ərzində Almaniya şirkətləri Azərbaycana 500 milyon dollar, Azərbaycan şirkətləri isə Almaniyaya 100 milyon dollar həcmində investisiya yatırıb. Hər iki ölkənin iqtisadi potensialını nəzərə alsaq, bunu yetərli hesab etmək olarmı? Məsələyə münasibət bildirən iqtisadçı-ekspert Vüqar Bayramovun sözlərinə görə, Azərbaycan çalışmalıdır ki, Almaniyadan daha çox investisiya cəlb etsin: "Çünki potensial daha böyükdür. Digər tərəfdən, Almaniya dünyanın aparıcı dövlətlərindən biridir. Eyni zamanda, ən çox investisiya yatıran dövlətlərdən biridir. İndiyə qədər olan qarşılıqlı yatırımlar yetərli deyil. İki ölkə arasında ticarət və iqtisadi dövriyyənin genişləndirilməsi imkanları daha böyükdür. Ona görə də Azərbaycan çalışmalıdır ki, Almaniyadan daha çox investisiya cəlb edilsin. Nəzərə almaq lazımdır ki, Almaniya şirkətləri üçün yeni bazarlar çox vacibdir. Yeni bazarlara çıxış aspektindən, təbii ki, Azərbaycan Almaniya üçün cəlbedici bazarlardan biridir. O baxımdan mövcud iqtisadi əlaqələr qənaətbəxş olsa da, bunu daha da inkişaf etdirmək lazımdır. Buna rəğmən, əlaqələrin genişləndirilməsi daha çox investisiyanın cəlb edilməsinə şərait yarada bilər. Azərbaycan növbəti postneft dövründə Almaniyadan daha çox sərmayənin cəlb edilməsinə çalışmalıdır. Bu da qeyri-neft sektorunda alman investisiyasının həcminin artmasına gətirib çıxara bilər".
Vidadi ORDAHALLI
