Zakir Əhmədov: "Bir sıra sahələrdə dövlət sifarişlərinin verilməsi məşğulluğun səviyyəsinin artmasına və işsizliyin azalmasına öz təsirini göstərib"
Azərbaycanda işsizliyin səviyyəsi 5 faizə qədər enib, əhalinin gəlirləri 8 dəfə artıb. Bunu əmək və əhalinin sosial müdafiəsi naziri Səlim Müslümov Avropa Şurası Parlament Assambleyasının (AŞPA) sosial məsələlər, sağlamlıq və davamlı inkişaf üzrə komitəsinin Bakıda təşkil etdiyi "Avropa Sosial Xartiyası prizmasından Azərbaycanda sosial, iqtisadi hüquqların möhkəmləndirilməsi" seminarında deyib.
Onun sözlərinə görə, insanların əmək hüququ qanunvericilik bazasında da yer alıb: "Bu qanunlar praktiki olaraq gerçəkləşdirilir. Bu istiqamətdə Prezident İlham Əliyev son 13 ildə 81 fərman və sərəncam imzalayıb".
Nazir bildirib ki, 2 milyon 330 min vətəndaşa hər ay 316 milyon manatdan çox vəsait ödənilib: "Bu da ölkə əhalisinin 23,7 faizini əhatə edir. Azərbaycan əhalisinin əmək və sosial təminat hüquqları ölkə Konstitusiyasında öz əksini tapıb, bu hüquqların həyata keçirilməsi üçün fundamental əsaslar təsbit olunub və geniş qanunvericilik bazası yaradılıb"
Göründüyü kimi, iqtisadi böhranın təsirlərinə baxmayaraq, ölkədə bunun təsirləri hər keçən gün azalmaqdadır. Bunun nəticəsidir ki, bəzi ölkələrlə müqayisədə Azərbaycanda işsizliyin səviyyəsi aşağıdır.
Məsələyə münasibət bildirən ekspert Zakir Əhmədovun sözlərinə görə, bu, ölkədə aparılan məqsədyönlü iqtisadi siyasətin nəticəsidir: "Məsələ ondadır ki, ölkədə iqtisadi inkişafla bağlı ciddi işlər görülür. Neft gəlirləri kəskin azalan dövrdə dövlət maksimum çalışdı ki, bundan əhali az ziyan görsün. Bununla bağlı bütün resurslar səfərbər edildi. Mövcud imkanlardan maksimum səmərəli istifadə olunması qarşıya məqsəd qoyuldu. Bir sıra sahələrdə dövlət sifarişlərinin verilməsi məşğulluğun səviyyəsinin artmasına və işsizliyin azalmasına öz təsirini göstərib. Ona görə də dünyadakı iqtisadi çətinliklərə rəğmən, Azərbaycanda iş yerlərinin kütləvi ixtisarı müşahidə olunmadı. Əksinə, son dövrlər yeni iş yerlərinin açılmasına stimul verildi. Bütün bunların kompleks şəkildə həyata keçirilməsi artıq öz bəhrəsini verməkdədir. Hesab edirəm ki, bu yöndə səyləri daha da artırmaq lazımdır".
Vidadi ORDAHALLI
