Rəsul Cahangirli: "Layihənin əhəmiyyəti həm də ondan ibarətdir ki, bu, gələcəkdə..."
"Biz "Azəri-Çırağı" "Əsrin müqaviləsi" adlandırmışdıq, indi isə mən əsrlərin müqaviləsindən danışıram". Bunu Prezident İlham Əliyev "Şahdəniz Mərhələ 2" üçün inşa olunan iki platformadan birinin - yaşayış blokları və texnoloji təchizat platformasının üst tikililərinin Bibiheybətdəki "Azfen" tikinti-quraşdırma sahəsindən Xəzər dənizindəki "Şahdəniz" müqavilə sahəsinə yolasalma mərasimindəki çıxışını ingilis dilində davam etdirərkən deyib.
O bildirib ki, BP ilə xüsusi münasibətlər o vaxtdan həmin şirkətin Azərbaycanın enerji bazarında, qlobal enerji bazarında fəal oyunçu olması faktına əsaslanır: "O vaxtdan indiyədək tərəfdaşlığımızı strateji tərəfdaşlığa çevirən bir çox başqa müqavilələr imzalanıb. Onlardan biri "Şahdəniz"dir. Növbədə "Dayaz sular" və başqaları var. Bu, tərəfdaşlığın yaxşı göstəricisidir. Biz BP-yə etimad göstəririk. Əminəm ki, BP də Azərbaycana etimad göstərir. Əks halda, onlar ölkəmizə bu qədər çox vəsait yatırmazdılar. Əminəm ki, "Şahdəniz"dən nəzərdə tutulandan daha çox qaz istehsal ediləcək".
Prezident onu da bildirib ki, Azərbaycanda fəaliyyət göstərən beynəlxalq komanda ölkəmizin inkişafına kömək edir: "Düşünürəm ki, ev sahibi olan ölkə yerli şirkət SOCAR ilə əcnəbi investorlar arasında nadir əməkdaşlıq mühiti yaradır".
Bütövlükdə, "Şahdəniz" layihəsinə verilən bü cür yüksək qiymətə, dəyərə ekspertlər necə yanaşır?
Məsələyə münasibət bildirən ekspert Rəsul Cahangirlinin sözlərinə görə, Prezidentin "Şahdəniz" layihəsinə verdiyi qiymət reallığı əks etdirir: "Ona görə ki, orada kəşf olunan qaz ehtiyatlarının həcmi kifayət qədər böyükdür. Bu da imkan verəcək ki, illərlə həm ölkənin, həm də digər ölkələrin qaza olan tələbatını ödəmək mümkün olsun. Məlum olduğu kimi, "Cənub Qaz Dəhlizi"nin ərsəyə gətirilməsi istiqamətində ciddi işlər həyata keçirilir. Bu istiqamətdə aparılan tikinti işlərinin qrafik üzrə həyata keçirilməsi onu deməyə əsas verir ki, artıq 2020-ci ildə "Şahdəniz" qazı Avropa bazarına çıxarılacaq. Bu, Avropa ölkələrinin qaza olan tələbatının müəyyən hissəsini ödəyəcək. Nəticədə qaz ixracından ölkəyə valyuta gəlirləri daxil olmağa başlayacaq. Digər tərəfdən, layihənin əhəmiyyəti həm də ondan ibarətdir ki, bu, gələcəkdə Türkmənistan qazının Avropaya çıxarılmasında təkanverici rol oynayacaq. Bu da, öz növbəsində, Azərbaycanın tranzit ölkə olaraq regionda və dünyada rolunu artıracaq. Hesab edirəm ki, "Şahdəniz" sazişi əsrlərin müqaviləsidir".
Vidadi ORDAHALLI
