Fazil Talıblı: "Təxminən 5 ildən bir hər bir standart araşdırılır və standartda olan müddəalar beynəlxalq tələblərə uyğunlaşdırılır"
Azərbaycanda ət məhsulları ilə bağlı standartlara dəyişiklik edilir. Artıq milli standartlar beynəlxalq standartlara uyğunlaşdırılır. Bunun üçün ət məhsulları istehsalçılarının xahişi ilə Standartlaşdırma, Metrologiya və Patent üzrə Dövlət Komitəsi tərəfindən işçi qrupu yaradılıb və milli standartlarda olan boşluqlar araşdırılıb.
Ət məhsulları ilə bağlı standartlara hansı dəyişikliklər ediləcək? Məsələ ilə bağlı Standartlaşdırma, Metrologiya və Patent üzrə Dövlət Komitəsinin mətbuat katibi Fazil Talıblıya müraciət etdik. O, "Bakı-Xəbər"ə açıqlamasında qeyd etdi ki, tək ət məhsulları üzrə deyil, bütün standartlar dövri yoxlamadan keçir: "Təxminən 5 ildən bir hər bir standart araşdırılır və standartda olan müddəalar beynəlxalq tələblərə uyğunlaşdırılır. Yaxud bu sahəyə aid olan yeniliklər sənayedə tətbiq olunduqca, standartlar müasir texnologiyalara uyğunlaşdırılır. Bu, SMPDK ilə yanaşı, Standartlaşdırma İnstitutunun gündəlik işidir".
Ət məhsulları ilə bağlı standartlara edilən dəyişikliklərə gəlincə, həmsöhbətimiz bildirdi ki, yerli məhsulların xarici bazara çıxışının artırılması ilə bağlı SMPDK tərəfindən ixrac qabiliyyətli məhsulların istehsalını şərtləndirən, onların keyfiyyət və təhlükəsizlik göstəricilərini əhatə edən standartlara baxılır: "O standartların xarici standartlara uyğunluğunun təmin olunması araşdırılır. Ət məhsulları istehsalçılarından gələn müraciət Texniki Komitə tərəfindən araşdırıldı və müəyyən olundu ki, ət məhsullarının xarici bazara çıxarılmasını təmin etmək üçün müvafiq standartlar tətbiq edilməlidir. Bununla da Azərbaycanda müasir texnologiyaların tətbiq olunduğu ət məhsulları istehsal olunacaq. Həmin məhsulların İran və MDV bazarlarına çıxışı təmin olunacaq".
Komitənin sözçüsü onu da vurğuladı ki, kolbasa və sosiskaların tərkibinə əlavələrin edilməsi onların saxlanma müddətinin artmasına da səbəb olacaq.
Azərbaycanda istehsal edilən kolbasa və sosiskaların ixrac edilə biləcəyi ölkələr də məlumdur. Standartlara edilən dəyişikliyin iyunun 15-nə kimi qəbul və tətbiq ediləcəyi gözlənir.
Günel CƏLİLOVA
