Əkrəm Həsənov: "Verilən hər bir kreditə görə banklar zəmanət fonduna müəyyən məbləğdə vəsait köçürəcək"
Azərbaycanda bankların verdiyi kreditlərə zəmanət fondu yaradılmalıdır. Bunu jurnalistlərə açıqlamasında Azərbaycan Banklar Assosiasiyasının (ABA) sədri Zakir Nuriyev deyib. Onun sözlərinə görə, bu fond kreditlərin illik faiz dərəcələri ilə bağlı məsuliyyətin bir hissəsini üzərinə götürməlidir. Hazırda banklar manatda 15 faizlə əmanət cəlb edir, risqlər nəzərə alınmaqla kreditlərin maya dəyəri 24-25 faizə çatır. Bu cür yüksək faizlə kiçik və orta biznesə kredit vermək çətindir, odur ki, zəmanət fonduna ehtiyac var.
Məsələ ilə bağlı fikir bildirən bank sahəsi üzrə mütəxəssis Əkrəm Həsənov "Bakı-Xəbər"ə açıqlamasında qeyd etdi ki, kreditlərin zəmanət fondu, bir növ, Əmanətlərin Sığortalanması Fonduna oxşayacaq: "Necə ki, vətəndaş banka əmanət qoyur və həmin yatırım geri qayıtmasa, məsələyə ƏSF nəzarət edir. Eyni ilə verilən kreditlər fond tərəfindən sığortalanacaq. Belə bir fondun yaradılması ideyası müsbətdir. Məlumat üçün bildirim ki, əksər xarici ölkələrdə vətəndaşlara verilən kreditlər sığortalanır. Sığorta təşkilatları da bu işdə maraqlı olmalıdır".
Həmsöhbətimizin fikrincə, hazırda ƏSF-nin vəziyyəti heç də ürəkaçan deyil: "Bağlanan bankların əmanətçilərinin əmanəti Mərkəzi Bank tərəfindən götürülən kredit hesabına ödənilir. Çünki həmin qurumun vəsaiti çoxdan qurtarıb".
Ə.Həsənovun sözlərinə görə, verilən hər bir kreditə görə banklar zəmanət fonduna müəyyən məbləğdə vəsait köçürəcək: "Əgər günlərin birində həmin kredit geri qayıtmasa, fondda yığılacaq".
Həmsöhbətimiz hesab edir ki, fondun yaradılması ilə kreditin alınması bahalaşacaq: "Məsələn, əvvəllər bankdan kredit götürən şəxs 50 manat dəyərində komisyon haqqı ödəyirdisə, indi bu məbləğ 200 manat olacaq. Səbəb kimi bank əməkdaşları qeyd edəcək ki, artıq onlar zəmanət fonduna da pul yatırır. Bu səbəbdən borc alanlar üçün vəziyyət heç də ürəkaçan olmayacaq. Yəni yenə əziyyəti kredit götürən şəxs çəkəcək".
Günel CƏLİLOVA
