Qulu İsmayılov: "Buna start verilməsi ABŞ-Azərbaycan münasibətlərinin yeni mərhələyə qədəm qoyması ilə əlaqələndirilə bilər"
Azərbaycan bu ilin may ayında ABŞ-ın Texas ştatının Korpus-Kristi limanına 500 min barrel həcmində "Azeri Light" nefti göndərib. Bunu ölkənin neft-qaz bazarındakı mənbə deyib. Onun sözlərinə görə, Azərbaycan neftinin Texasa tədarükü uzun müddət ərzində ilk dəfə həyata keçirilib: "500 min barrel həcmində "Azeri Light" nefti Texasa iki həftə əvvəl çatıb. Bu, 2012-ci ildən etibarən Azərbaycan neftinin həmin ştata ilk tədarüküdür".
Qeyd edək ki, bu, cari ildə Azərbaycan neftinin ABŞ-a ikinci iri ixrac həcmidir. Belə ki, SOCAR apreldə Ceyhan limanından ABŞ-a 800 min barrel həcmində "Azeri Light" nefti tədarük etmişdi.
Bunu Azərbaycan-ABŞ münasibətlərində yeni səhifə adlandırmaq olarmı?
Ekspert Qulu İsmayılovun sözlərinə görə, bunu münasibətlərin yeni mərhələsi kimi qəbul etmək olar: "Hadisələrin gedişinə fikir verək. Donald Tramp Bakıda keçirilən 24-cü Beynəlxalq Neft və Qaz Sərgisinin rəsmi açılış mərasiminə göndərdiyi məktubda Azərbaycanın roluna böyük önəm verdiyini bildirir. Məhz bu ərəfədə Azərbaycanın 5 illik fasilədən sonra ABŞ-a neft satması barədə məlumat yayılır. Azərbaycanla ABŞ arasında strateji əməkdaşlıq normal məcrada olub. Xüsusilə də 11 sentyabr terror aktlarından sonra Azərbaycan terrorçuluqla mübarizədə ABŞ-a hərtərəfli yardım göstərib, öz sülhməramlı qüvvələrini Əfqanıstana göndərib, 2001-ci ildən bəri hər il Əfqanıstanda yerləşən ABŞ qoşunlarının təchizatının Azərbaycan vasitəsilə daşınması barədə məlumatlar yayılıb.
Təbii ki, böyük neft və qaz ehtiyatlarına malik Azərbaycan ABŞ və Avropanın enerji təhlükəsizliyinə töhfələr verir, Avropanın enerji təchizatını şaxələndirəcək "Cənub Enerji Dəhlizi"nin ən önəmli bəndi olaraq qalmaqdadır.
Azərbaycan öz suverenliyini və müstəqilliyini möhkəmləndirən və sürətlə inkişaf edən bir ölkə kimi ABŞ-ın diqqətini cəlb edir.
ABŞ Azərbaycan kimi müttəfiqinin olmasında çox maraqlıdır. Azərbaycandan ABŞ-a neft satışı əvvəllər də olub. Bu ticarət birbaşa aparılmır. Buna "Svop" əməliyyatı deyirlər. Əvvəl bu ticarət belə həyata keçirilib. Azərbaycan və Venesuela arasında aparılan "svop" əməliyyatları nəticəsində ABŞ-a neft satıb.
Proses belə həyata keçirilib. Venesuela və Belarus arasında bağlanan müqaviləyə əsasən, Venesuela Belarusa neft satmalı olub. Həmin həcmi Belarusa Azərbaycan çatdırdı. Venesuela isə bunun müqabilində eyni həcmdə nefti Azərbaycana satdı. Azərbaycan bu nefti ölkəyə gəlmədən Venesueladan tankerlər vasitəsilə birbaşa olaraq ABŞ bazarına çıxardı. Yəqin ki, proses yenə "svop" əməliyyatı üzrə aparılıb. Bu, məsələnin iqtisadi aspektidir. Etiraf edək ki, son 5 ildə belə ticarət aparılmırdı. Buna start verilməsi ABŞ-Azərbaycan münasibətlərinin yeni mərhələyə qədəm qoyması ilə əlaqələndirilə bilər".
Məhəmmədəli QƏRİBLİ
