Vüqar Bayramov: "Yeni qanun güzəştlərlə yanaşı, xarici investorlara bu zəmanəti verməyi nəzərdə tutur"
Prezident İlham Əliyev azad iqtisadi zonalar yaradılması işinin sürətləndirilməsinə dair sərəncam imzalayıb. Sərəncamda deyilir ki, son illər aparılan davamlı islahatlar siyasəti ölkənin iqtisadi qüdrətinin daha da güclənməsinə imkan yaradıb, dinamik sosial-iqtisadi inkişafa təkan verib.
Transmilli enerji infrastrukturu və beynəlxalq nəqliyyat layihələrinin Azərbaycanda reallaşdırılması investorların ölkəmizə marağını xeyli artırıb. Xarici investisiyaların cəlb edilməsi əlverişli coğrafi mövqeyi ilə seçilən ərazilərin logistik və sənaye potensialından tam istifadə olunmasına, iqtisadiyyatımızın daha da möhkəmlənməsinə, büdcə gəlirlərinin diversifikasiyasına və əhalinin məşğulluğuna böyük töhfə verə bilər.
Məhz buna görə də "Bakı şəhəri Qaradağ rayonunun Ələt qəsəbəsində yeni Bakı Beynəlxalq Dəniz Ticarət Limanının ərazisi daxil olmaqla azad ticarət zonası tipli xüsusi iqtisadi zonanın yaradılması ilə bağlı tədbirlər haqqında" Azərbaycan Respublikası Prezidentinin 2016-cı il 17 mart tarixli, 1912 nömrəli Sərəncamının icrası ilə əlaqədar hazırlanmış normativ-hüquqi aktların layihələri "azad iqtisadi zona" elan ediləcək ərazilərdə həyata keçiriləcək iqtisadi fəaliyyət üçün əlverişli hüquqi rejimin müəyyənləşdirilməsini nəzərdə tutur.
Fərmana əsasən, azad iqtisadi zonaların yaradılmasının sürətləndirilməsi məqsədilə bir neçə qurumdan ibarət İşçi qrup yaradılıb.
Maraqlıdır, sözügedən qərardan ekspertlərin gözləntiləri nədir? Məsələyə münasibət bildirən iqtisadçı-ekspert Vüqar Bayramovun fikrincə, azad iqtisadi zonaların yaradılması faydalıdır: "Söhbət indiki halda Ələt iqtisadi zonasının yaradılmasından gedir. Əslində, bu cür müzakirələr xarici iş adamları ilə aparılırdı. Azərbaycan hökuməti çalışır ki, yalnız Ələtdə deyil, digər bölgələrdə yaradılacaq iqtisadi zonalarda da xarici iş adamları iştirak etsin. Azad iqtisadi zonalar xarici investisiyanın cəlbi baxımından mühüm əhəmiyyət kəsb edir. Azad iqtisadi zonanın yaradılması və bunun reallaşması doğru addımdır. Biz dünya bazarında neftin qiymətinin yüksək olduğu dövrlərdə belə azad iqtisadi zonanın yaradılması ilə bağlı təkliflər ünvanlamışdıq. Azad iqtisadi zonalarda xarici investorlara xüsusi güzəştlərin verilməsi ilə yanaşı, həm də xarici investisiyanın qorunmasını, onlarla bağlı mübahisələrin həlli müxanizminin ayrca bir qanun halında olmasını nəzərdə tutur. Əsasən pay bölgüsü kimi razılaşmaların statusuna uyğun qanunvericiliyin hazırlanması planlaşdırılır. Burada da məqsəd ondan ibarətdir ki, investorlara xarici investisiyanın qorunması ilə bağlı dövlət zəmanət versin. Çünki xarici investor həm güzəşt, həm də zəmanət istəyir. Yeni qanun güzəştlərlə yanaşı, bu zəmanəti xarici investorlara verməyi nəzərdə tutur. Bu isə xarici investisiyanın cəlb edilməsinə müsbət təsir göstərəcək. Azad iqtisadi zonaların yaradılması davam etməlidir. Ələtlə yanaşı, digər bögələrdə də azad iqtisadi zonaların təşkili faydalı olar".
Vidadi ORDAHALLI
