Qadir Bayramlı: "Toxumçuluq sahəsində işlər görülərsə, yumşaq buğda növünün istehsalına önəm verilməlidir"
Xəbər verildiyi kimi, Azərbaycanda toxum istehsalı və emalı zavodu tikiləcək. Kənd təsərrüfatı naziri Heydər Əsədov media nümayəndələrinə açıqlamasında qeyd edib ki, bu il kənd təsərrüfatı sektorunun qarşısında dayanan əsas məqsəd toxum istehsalının inkişafıdır.
Onun sözlərinə görə, bunun üçün artıq lazımi işlər aparılır. Nazir bildirib: "Tərəvəz və kartof toxumlarının istehsalında ixtisaslaşan iri müəssisələrin tikintisi artıq başlayıb. Fikrimcə, ilin sonunadək bu müəssisələr istifadəyə veriləcək. Gələcəkdə də digər toxumların istehsalı və emalı zavodlarının tikilməsi planlaşdırılır".
Azərbaycanda toxum istehsalı və emalı zavodunun tikilməsi aqrar sahəyə necə təsir edəcək? Məsələ ilə bağlı fikir bildirən aqrar sahə üzrə ekspert Qadir Bayramlı "Bakı-Xəbər"ə açıqlamasında qeyd etdi ki, toxum istehsalı kənd təsərrüfatı sahəsinin ən zəif yeridir: "Sovet dönəmində fəaliyyət göstərən toxumçuluq təsərrüfatları artıq əvvəlki səviyyədə çalışmır. Azərbaycanda toxum təsərrüfatlarının yaradılması və onun inkişaf etdirilməsi vacibdir. Çünki aqrar sahənin inkişafı toxumçuluqdan asılıdır. Yaxşı olar ki, bölgələrdə toxumçuluq təsərrüfatları yaradılsın".
Həmsöhbətimizin sözlərinə görə, kənd təsərrüfatı ilə məşğul olan şəxs toxumu düzgün seçirsə, məhsulu bol olur, yox, düzgün toxum seçilməzsə, kəndli əks mənzərə ilə qarşılaşır. Q.Bayramlı onu da bildirdi ki, hazırda taxılçılıq sahəsinə önəm verilməlidir: "Çünki ölkəmizdə sərt buğda növü yetişdirilir. Sərt buğdanı isə bizim dəyirmanların üyütməsi mümkün deyil. Sovet dönəminin dəyirmanlarında həmin buğda növü üyüdülürdü. Ancaq indiki dəyirmanlar isə xaricdən gətirilən yumşaq buğdanı üyüdür. Bu səbəbdən də fermerlərin yetişdirdiyi buğda heyvandarlıqda yem olaraq istifadə olunur. Hesab edirəm ki, toxumçuluq sahəsində işlər görülərsə, yumşaq buğda növünün istehsalına önəm verilməlidir. Fermerlər yumşaq buğda növü ilə təmin olunarsa, o zaman xaricdən idxal olunan buğdanın miqdarı azalar.
Həmçinin, onu da deyim ki, pivə istehsalında əsas xammal arpadır. Arpa da xaricdən gətirilir. Bu səbəbdən hesab edirəm ki, pivə üçün yararlı arpa ölkəmizdə yetişdirilməlidir.
İstər buğda, istərsə də taxıl üçün toxum bölgələrin xüsusiyyələrinə görə seçilməlidir. Bəllidir ki, dağlıq, dağətəyi və ya düzənlik bölgənin coğrafi xüsusiyyətləri fərqli olur. Toxumçuluq mərkəzi yarananda bu kimi detallar nəzərə alınmalıdır".
Günel CƏLİLOVA
