Abutalıb Səmədov: “Məqsəd Ukraynanı günahlandırmaq və məsuliyyəti Ukraynanın üzərinə yıxmaqdır”
Rusiya prezidentinin mətbuat katibi Dmitri Peskov bildirib ki, Rusiya gələn həftə Türkiyədə keçiriləcək NATO sammitindən əvvəl ayıq olmalı və Kiyevin təxribatlarına hazır olmalıdır. NATO sammiti 7-8 iyul tarixlərində Ankarada keçiriləcək.
Peskov Vesti Xəbər Agentliyinin müəllifi Pavel Zarubinə bu məsələ ilə bağlı suala cavab olaraq bildirib ki, "Biz təxribatları gözləməli və istənilən an ayıq olmalıyıq".
Onun sözlərinə görə, xüsusi hərbi əməliyyat "əsl müharibə kimi davam edir", çünki Kiyev Berlin, Paris, Haaqa, Oslo və Vaşinqtondan dəstək alır.
"Müharibə gedir, bu, əsl müharibədir. Bilirsinizmi, niyə müharibə gedir? Çünki Kiyevin arxasında Berlin, Paris, Haaqa, Oslo və təəssüf ki, Vaşinqton dayanır. Çünki onlara öz peykləri vasitəsilə hədəf almağa kömək edilir və onlara bütün infrastrukturları vasitəsilə xarici silahları hədəflərimizə yönəltməyə kömək edilir", - deyə Peskov bildirib.
Peskov deyib ki, Rusiya Ukrayna ilə məhdud hərbi əməliyyata başlamışdı, Kiyev onu müharibəyə çevirdi. Çünki Qərb ölkələri, rəsmi Kiyevə müxtəlif fondlar komək etdilər və sair. Yəni Peskov demək istəyir ki, Rusiya Ukraynadakı hadisələri müharibə kimi başlamayıb, məhdud xüsusi əməliyyat kimi başlayıb. Bu doğrudanmı belədir? Rusiyanın başladığına müharibə yox, məhdud xüsusi əməliyyat demək olarmı? Bu xüsusi hərbi əməliyyat adında əsl müharibə deyilmi? Yəni doğrudanmı, onun müharibəyə çevrilməsi Avropa dövlətlərinin Ukraynaya verdiyi dəstəklə bağlıdır, yoxsa elə bu kökündən müharibədir?
Müharibə necə olar ki, hücum edib əraziləri tutub Rusiya. Peskov nə dərəcədə haqlıdır ki, bunu məhdud hərbi əməliyyat kimi başlayıbmış Rusiya Ukrayna onu müharibəyə çevirib?
“Alyans”SAM-ın sədri Abutalıb Səmədov baki-xeber.com-a Rusiya Ukraynaya qarşı hərbi əməliyyatları başlayarkən bunu müharibə adlandırmadı. “Çünki müharibə olması üçün elan olunmalıdır və onun da müəyyən nəticələri var. Xüsusi hərbi əməliyyat adını verdi. Demək ki, Ukraynada xüsusi hərbi əməliyyat keçirmək istəyirlər və qısa müddətdə Ukraynanın 200 min kvadrat kilometrə yaxın ərazisini işğal etdi. Bu xüsusi hərbi əməliyyat nəticəsində sonradan həmin ərazilərin 80 min kvadrat kilometri Ukrayna tərəfindən geri qaytarıldı. 2022-ci ilin sentyabr-noyabr ayları arasında. Müharibə artıq 4 ildir davam edir və Rusiyanın bu xüsusi hərbi əməliyyat adlandırdığı döyüşlər həm Birinci Dünya müharibəsindən, həm də İkinci Dünya müharibəsindən daha uzunmüddətli hərbi əməliyyatdır. Əgər rusların dediyini qəbul etmiş olsaq. Təbii ki, bu müharibədir. Elə ilk gündən Rusiya Ukraynaya qarşı müharibə başladı. İndi günahı Ukraynanın üstə yıxmaq üçün Peskov deyir ki, biz hərbi əməliyyat kimi başlamışdıq. Ancaq Ukrayna və onun müttəfiqləri bu hərbi əməliyyatı müharibəyə çevirdilər və izah etmir ki, hərbi əməliyyatla müharibənin fərqi nədədir. Müharibəyə çevriləndən sonra nə dəyişdi? Nə vaxtdan bu müharibəyə çevrildi? Elə fevralın 24-də Rusiya hücuma keçdi və elə həmin gündən başlayaraq Qərb Ukraynaya dəstək göstərməyə başladı”. A.Səmədov qeyd etdi ki, düzdür, əvvəl bir qədər zəif, sonradan tədricən daha ciddi, deməli, yardımlar göstərildi. “Onda belə çıxır ki, elə hərbi əməliyyatların ilk günündən Ukrayna bu əməliyyatları müharibəyə çevirib. Təbii ki, bunun həqiqətlə heç bir əlaqəsi yoxdur. Məqsəd Ukraynanı günahlandırmaq və məsuliyyəti Ukraynanın üzərinə yıxmaqdır. İndi də tez-tez sülhə meyilli olduqlarını deyirlər. Sülh istədiklərini deyirlər və Ukraynanın sülh prosesini pozduğunu iddia edirlər. Bütün bunlar təbii ki, həqiqətdən uzaq iddialardır. Bəllidir ki, bir neçə gün bundan əvvəl Tramp prezident Putinə zəng edib, onunla Ukrayna məsələsini müzakirə edib. Məqsəd Türkiyədə keçiriləcək NATO sammitində Zelenski ilə bir daha bu məsələni müzakirə etməkdir. Yəni, Birləşmiş Ştatlarının prezidenti əvvəl Rusiyanın mövqeyini bir daha dəqiqləşdirmək və onun hansı güzəştlərə gedə biləcəyini öyrənmək istəyib. Və çox güman ki, Ankarada NATO sammitində Zelenski ilə Tramp arasında çox ciddi söhbət olacaq və söhbətin necə gedəcəyi də təqribən aydındır. Tramp Zelenskıyə təzyiq göstərməyə çalışacaq ki, ərazi güzəştini, yəni Donbası bütünlüklə Rusiyaya vermək tələbini qəbul etsin. Çünki son günlər məlumdur ki, rus qoşunları Donetsk vilayətində bir az irəliləyiblər. Konstantinovka deyilən şəhəri ələ keçiriblər və Putin də bunu Trampa xüsusi təntənə ilə çatdırıb ki, onsuz da biz irəli gedirik və insan ölümünün qarşısını almaq üçün yaxşı olar ki, sülhə razılaş, sülh razılaşması imzalansın. Bütün bu bəyanatlar da bu məqsədə xidmət edir. Rusiya artıq müharibədən yorulub, sülhə nail olmaq istəyir, eyni zamanda öz məqsədlərini də təmin etmək istəyir. Peskovun bu bəyanatı Zelenski və Ukrayna əleyhinə təbliğatın bir hissəsidir”-deyə A.Səmədov qeyd etdi.
İradə SARIYEVA
