"Die Welt" qəzeti İran Qızıl Aypara Cəmiyyətinin ölkənin Birinci vitse-prezidentinə göndərdiyi məktubun təfərrüatlarını əldə edib. Jurnalistlərin əldə etdiyi sənədlərə görə, rejim keçmiş Ali Lider Ayətullah Əli Xameneinin tarixi dəfn mərasimləri zamanı izdiham və qızmar istilər səbəbindən 1500-3000 arasında insanın həyatını itirə biləcəyini proqnozlaşdırılıb.
Məktubun ortaya çıxmasından sonra “Die Welt” iddia etdi ki, rejim rəsmiləri potensial fəlakətin qarşısını almaq üçün artıq xüsusi əməliyyat qrupu yaradıblar.
Tehran yaxınlığındakı ölkənin ən böyük qəbiristanlığı olan Beheşt-e Zəhrada tələsik minlərlə yeni məzarın qazıldığı bildirilir. Qəzetə danışan Tehran bələdiyyəsindən bir mənbə də dəhşətli hazırlıqları etiraf edib: "Hazırlanmış məzarlar həqiqətən də mövcuddur. Rejim rəsmilərinə 3000 ölümün qeydə alına biləcəyi və bu rəqəmin problem yaratmayacağı deyilib. Belə izdihamlı bir mərasimdə və bu qızmar istidə heç kim nə baş verəcəyini dəqiq deyə bilməz".
İran rəsmiləri Tehranda keçiriləcən mərasimlərdə 10 milyondan çox insanın iştirak edəcəyini gözlədiklərini bildiriblər.
İranın keçmiş liderlərinin dəfn mərasimlərində baş verən ölümcül izdihamların xronologiyasına diqqət çəkən Alman mediası, rejimin qurucusu Ayətullah Xomeyninin 1989-cu ildəki dəfn mərasimini xatırladıb. Həmin dəfn mərasimində milyonlarla insanın tabuta hücumu çox sayda ölüm və yaralanma ilə nəticələnmişdi.
Eynilə, 2020-ci ildə ABŞ-ın hücumunda həlak olan İslam İnqilabı Keşikçiləri Korpusunun Qüds Qüvvələrinin komandanı Qasım Süleymaninin dəfn mərasimində rəsmi məlumatlara görə, Kermanda ən azı 56 nəfər əzilərək ölüb, yüzlərlə insan yaralanıb.
Tahir TAĞIYEV
