Rusiya Kommunist Partiyasının lideri Gennadi Züqanov ABŞ prezidenti Trampın kommunizmə qarşı sərt açıqlamalarına münasibət bildirib və iddia edib ki, bu açıqlamalar Vaşinqtonun Çinlə qarşıdurmasından irəli gəlir.
Züqanovun sözlərinə görə, ABŞ Çini özünün əsas strateji rəqibi kimi görür və buna görə də ölkənin Kommunist Partiyasını zəiflətməyə çalışır.
"Trampın strategiyasını açın, onun əsas düşmənlərinin və əleyhdarlarının kim olduğunu oxuyacaqsınız. İlk olaraq Çin və Kommunist Partiyası. Niyə Kommunist Partiyası? Çünki o, ölkəsini dünyanın aparıcı gücünə çevirib... Və bu ölkəni məhv etmək üçün Kommunist Partiyası və kommunistlər boğulmalıdır", - deyə o bildirib.
Rusiya Kommunist Partiyasının lideri ABŞ prezidentinin özü haqqında isə sərt danışıb.
"Trampın davranışında yeni bir şey yoxdur. O, açıq-aşkar imperialist, böyük tacir və beynəlxalq səhnədə mütləq, yüz faiz quldurdur. Tramp yeni bir şey deməyib, deyə də bilməz. Onun bunun üçün ağlı, nə də vicdanı var; o, başqalarını soymaqla və təhdid etməklə ciblərini doldurmağa öyrəşib və bunu həmişə edir, yumruğunu planetə çırpır", - Züqanov deyib.
Bundan əlavə, KP lideri Rusiyanı Trampla heç bir razılaşmaya etibar etməməyə çağırıb. O, həmçinin bildirib ki, ABŞ Rusiyaya əhəmiyyətli təbii sərvətlərə malik ölkə kimi baxdığı üçün ona təzyiq göstərməyə davam edəcək.
Daha əvvəl, Müstəqillik Günü nitqində Donald Tramp kommunizmi "Amerikanın azadlığına ölümcül təhlükə" adlandırmış və onu Birinci və İkinci Dünya müharibələrindən, Perl-Harbora hücumdan və 11 sentyabr terror hücumlarından "ən böyük təhlükə" hesab etdiyini bildirib. Bir həftə əvvəl isə Amerika prezidenti kommunistləri "heyvanlar" və "bir çox hallarda axmaq" adlandırmışdı.
Tahir TAĞIYEV
