Qulu İsmayılov: "Azərbaycan həmin problemi kökündən həll edib"
Rusiyanın 2030-cu ilə qədər iqtisadi təhlükəsizlik strategiyası prezident Vladimir Putin tərəfindən təsdiq edilib. Sənəddə əsas risq faktorları kimi xammal ixracı əsasında qurulan inkişaf modeli və neft-qaz ehtiyatlarının tükənməsi göstərilib. İqtisadi təhlükəsizliyə əsas təhdidlər arasında "iqtisadi inkişafın xammal ixracı modelinin tükənməsi, iqtisadi artımda ənənəvi amillərin rolunun kəskin zəifləməsi" və "dünya iqtisadiyyatının qlobal liderləri arasında Rusiyanın qeyri-xammal şirkətlərinin olmaması" qeyd olunub.
Həmçinin, bildirilib ki, dünya əmtəə və maliyyə bazarlarında qeyri-sabit vəziyyət yanacaq istehsalı üçün istifadə edilən mineral ehtiyatların və mövcud yataqların tədricən tükənməsinə şərait yaradıb. Strategiya müəllifləri işçi qüvvənin qıtlığını, varlılarla yoxsullar arasında fərq artımını və ölkəyə qarşı tətbiq olunan iqtisadi sanksiyaları da iqtisadi təhlükəsizliyə əsas təhdidlər cərgəsinə aid ediblər.
Sənəddə qeyd olunur ki, Rusiya digər ölkələrin sanksiyalarına məruz qaldığı halda, həmin ölkələrə qarşı cavab sanksiyaların tətbiq edilməsi mexanizmini təkmilləşdirməli və eləcə də əmək miqrantları axınını tənzimləməlidir.
Strategiyanın yerinə yetirilməsinə hökumət nəzarət edərək görülən tədbirlər barədə prezidentə illik hesabat hazırlayacaq.
Bu mənzərənin perspektivlərini Azərbaycan müstəvisinə transfer edib müqayisə aparanda maraqlı nəticələr alınır. Ancaq aşkar görünür ki, Rusiyanın qəbul etdiyi strategiyada risq faktoru kimi qeyd edilən amillərin çoxundan Azərbaycan yürütdüyü düzgün siyasət nəticəsində sığortalana bilib.
Yəni Azərbaycan bu risqlərin bir çoxunun baş verməyəcəyinə əmin ola bilər.
Azərbaycanın yürütdüyü bu cür iqtisadi siyasəti necə dəyərləndirmək olar?
İqtisadçı Qulu İsmayılov qəzetimizə bildirdi ki, Rusiyada ilk iqtisadi təhlükəsizlik strategiyası 1998-ci ildə qəbul olunub: "Yeni strategiyanın hazırlanması barədə qərar 2015-ci ildə qəbul olunub. Bundan əvvəl V.Putin bildirmişdi ki, yeni strategiya Rusiyaya 2020-ci ildə dünya səviyyəsini üstələyən iqtisadi artım sürətini təmin etməlidir. Ancaq görünür ki, proqnozlar özünü tam doğrultmayıb. Strategiyada sanksiyalar məsələsinə xüsusi önəm verilib. Başlıca faktor isə neft amili ilə bağlıdır. Çünki Rusiya neft ixrac edən bir ölkədir və yanacaq daşıyıcılarının qiymətinin kəskin şəkildə aşağı düşməsi belə bir risq faktoru yaratmış olub. Azərbaycan da neft ölkəsi olaraq belə risqləri əvvəlcədən görüb və qabaqlayıcı addımlar atıb. Təsadüfi deyil ki, ölkə başçısı bir necə dəfə çıxışlarında vurğulayıb ki, neftin qiymətinin aşağı düşməsi şəraitində iqtisadiyyatımız öz gücünü qoruyub saxlaya bilib. Təbii ki, bütün bunlar düzgün hesablanmış strategiya hesabına baş tutub. Azərbaycanda qeyri-neft sektoru çox güclü inkişaf etdirilib. Əhalinin yoxsulluğunun aradan qaldırılması istiqamətində ciddi tədbirlər həyata keçirilib. Yoxsulluğun faizi, demək olar ki, yox həddinə çatdırılıb. Həmin təbəqədən olan insanlara dövlət tərəfindən güzəştli sosial yardımlar verilir. Hesab edirəm ki, Azərbaycan bu uğurlara düzgün müəyyən edilmiş hədəflər və atılan doğru addımlar nəticəsində nail ola bilib. Əmək miqrantlarının axını məsələsində də Azərbaycan həmin problemi kökündən həll edib. Bizdə bu sahədə sərt miqrasiya qanunvericiliyi qüvvədədir".
Məhəmmədəli QƏRİBLİ
