Vahid Məhərrəmov: "Elə etmək lazımdır ki, məhsulu istehsal edənlər bundan yüksək gəlir əldə etsin"
Azərbaycan Prezidenti İlham Əliyev şəkər çuğunduru istehsalının stimullaşdırılması haqqında fərman imzalayıb. Fərmana əsasən, şəkər çuğundurunun emalı ilə məşğul olan hüquqi şəxslərə və hüquqi şəxs yaratmadan sahibkarlıq fəaliyyəti həyata keçirən fiziki şəxslərə təhvil verilmiş şəkər çuğundurunun hər tonuna görə onun istehsalçılarına 4 manat məbləğində subsidiya ödəniləcək.
Kənd təsərrüfatı məhsulları istehsalçılarına əkin sahəsinin becərilməsində istifadə etdikləri yanacaq və motor yağlarına görə dövlət büdcəsinin vəsaiti hesabına verilən yardım 2017-ci ildən şəkər çuğunduru əkinlərinə şamil edilməyəcək.
Nazirlər Kabinetinə şəkər çuğundurunun emalı ilə məşğul olan hüquqi şəxslərə və hüquqi şəxs yaratmadan sahibkarlıq fəaliyyəti həyata keçirən fiziki şəxslərə təhvil verilmiş şəkər çuğundurunun hər tonuna görə onun istehsalçılarına subsidiya verilməsi qaydasını Azərbaycan Prezidenti ilə razılaşdırmaqla iki ay müddətində müəyyən etmək tapşırılıb.
Azərbaycanın bir sıra rayonlarında şəkər çuğunduru becərilir. Heç şübhəsiz ki, dövlət tərəfindən bu məqsədlə subsidiyanın ayrılması fermerlərin məhsul istehsalına maddi marağını artıracaq.
Maraqlıdır, bəs ekspertlər sözügedən qərarı necə dəyərləndirir?
Məsələyə münasibət bildirən kənd təsərrüfatı sahəsi üzrə mütəxəssis Vahid Məhərrəmovun sözlərinə görə, bu gün dünya bazarında şəkər çuğundurunun qiyməti yüksəkdir: "Bir sıra mal və məhsullar var ki, onlar dünya bazarında yüksək dəyərə malikdir. Həmin mal və məhsullardan biri də şəkər çuğundurudur. Bu gün dünya bazarında şəkərin bir tonunun qiyməti 465 dollardır. Bu da Azərbaycan pulu ilə 800 manat edir. Azərbaycanda isə şəkərin bir tonunun satış qiyməti 1250 manatdır. Bu da o deməkdir ki, istehsal olunan şəkər çuğundurunun üzərinə 50 faiz qazanc qoyulur. Yəni dünya bazarı ilə müqayisədə 50 faiz yüksəkdir. Bu da imkan verir ki, bizim emalla məşğul olan sahibkarlar əldə etdikləri gəlirin bir hissəsini şəkər çuğunduru istehsal edən fermerlər, kəndlilərlə bölüşdürsünlər. Hesab edirəm ki, məhz buna imkan yaratmaq lazımdır. Buna görə də ölkədə rəqabət mühiti yaratmaq lazımdır ki, şəkər çuğunduru istehsalı ilə məşğul olan fermerlər üçün də seçim imkanı yaransın. Fermerlər o emal şirkətləri ilə müqavilə bağlamalıdır ki, onların qiyməti onlara sərf edir. Əvvəl müəyyən təkliflər vermişik. Həmin təkliflərin mahiyyəti ondan ibarətdir ki, əkin sahələrinin ərazisinə görə yox, əldə olunan məhsulun həcminə görə subsidiyanın verilməsi daha məqsədəuyğundur. İndi də fermerlərə həmin prinsiplər üzrə subsidiya verilir. Elə etmək lazımdır ki, məhsulu istehsal edənlər bundan yüksək gəlir əldə etsin. Digər tərəfdən, toxumçuluğun, seleksiyanın inkişaf etdirilməsinə ehtiyac var".
Vidadi ORDAHALLI
