Fazil Mustafa: "Türkiyə ilə yolun birləşdirilməsi Naxçıvanın kommunikasiyasına böyük müsbət təsir göstərəcək"
"Naxçıvanla Türkiyəni birləşdirəcək dəmir yolunun layihəsi hazırlanıb". Bunu Türkiyənin nəqliyyat, dənizçilik və rabitə naziri Əhməd Arslan İğdıra səfəri zamanı bildirib.
Ə.Arslan deyib ki, Qars-İğdır, Dilucu-Naxçıvan dəmir yolu layihələrinin hazırlanması başa çatıb: "Avropadan gələn bir qatarın Qarsdan İğdıra, İğdırdan Naxçıvana, Naxçıvandan Orta Asiyaya getməsi nəzərdə tutulur. Bu dəmir yolu Türkiyəni, Naxçıvanı, Azərbaycanı daha da gücləndirəcək, ticarətin artmasına səbəb olacaq. Rəhmətlik Heydər Əliyev "bir millət, iki dövlət" olduğumuzu bildirib. Ona görə də Qars-İğdır, Dilucu-Naxçıvan dəmir yoluna çox böyük əhəmiyyət veririk. Layihənin hazırlanması başa çatıb, növbədə layihənin icra edilməsidir. Bu məsələ ilə bağlı Azərbaycanla müzakirələr aparırıq".
Onu da qeyd edək ki, Naxçıvanın blokadadan çıxarılması istiqamətində ciddi işlər görülür. Yanvarın 10-da Azərbaycan Respublikasının Prezidenti İlham Əliyevin sədrliyi ilə Nazirlər Kabinetinin 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan iclasında dövlət başçısı Naxçıvanla bağlı vacib məqama toxunub. Ölkə rəhbəri həyata keçirilən layihələr nəticəsində muxtar respublikanın dəmir yolu blokadasından çıxarılacağını bildirib: "Keçən il nəqliyyat sektorunda önəmli hadisələr baş vermişdir. Xüsusilə "Şimal-Cənub" dəhlizinin yaradılması istiqamətində çox ciddi addımlar atılıb. Biz bu layihənin icrası ilə, eyni zamanda, Naxçıvanı da dəmir yolu blokadasından çıxaracağıq. Naxçıvan İran ərazisindən dəmir yolu vasitəsilə Azərbaycanla birləşəcək. Yəni bu, tarixi layihədir və biz bunu qonşu, dost ölkələrlə birlikdə icra edirik".
Bütün bu deyilənlərin fonunda, Naxçıvanla Türkiyəni birləşdirəcək dəmir yolunun layihəsinin əhəmiyyətini ekspertlər necə dəyərləndirir? Məsələyə münasibət bildirən millət vəkili Fazil Mustafanın sözlərinə görə, sözügedən dəmir yolu layihəsinin böyük əhəmiyyəti var: "Əvvəla sözügedən layihənin həyata keçirilməsi böyük maliyyə vəsaiti tələb edir. Ancaq çəkiləcəyi planlaşdırılan sözügedən dəmir yolu vacib əhəmiyyət kəsb edir. Çünki Türkiyə ilə dəmir yolunun birləşdirilməsi Naxçıvanın kommunikasiyasına böyük müsbət təsir göstərəcək. Ən azından bu, muxtar respublikanın dəmir yolu vasitəsilə blokadadan çıxmasına şərait yaradacaq. Bunun nəticəsində Naxçıvanda iqtisadiyyat daha da inkişaf edib böyüyəcək. Ona görə də belə bir layihənin olması ümumi maraqlarımıza uyğundur".
Vidadi ORDAHALLI
