"Xəzər Dəniz Gəmiçiliyi" insaflı olsa, yükdaşımalar artacaq"
"Mən əvvəllər də "Azərbaycan Dəmir Yolları" QSC-də çalışmışam. Sonradan Nəqliyyat Nazirliyinə təyinat aldım. İş elə gətirdi ki, yenidən "Azərbaycan Dəmir Yolları" QSC-yə qayıtmalı oldum. Bura qayıtdıqdan sonra ciddi problemlərin şahidi oldum".
"APA-Economics" xəbər verir ki, bunu "Azərbaycan Dəmir Yolları" QSC-nin sədri Cavid Qurbanov bildirib. Onun sözlərinə görə, həmin vaxt lokomotiv parkı yox dərəcəsində olub: "10-12 yaşında elektrovoz və teplovozlar alınaraq, Azərbaycana gətirilmişdi. Rusiyada 20-30 il istismar olunmuş, sonradan təmir olunmuş lokomotivlər alınırdı. Başladıq vaqon parkında araşdırma aparmağa. Daşınma xidmətlərinin rəisini çağırdım yanıma və birgə parka baxdıq. Gördük ki, 2023-cü ilədək belə davam etsə, parkımızda 123 vaqon qalacaq, qalanları sıradan çıxacaq. Yol infrastrukturunda rabitə sistemi yox dərəcəsində idi. Vəziyyət o həddə idi ki, maşinistlər bir-biri ilə mobil telefonla əlaqə saxlayırdı. İşlərin əksəriyyətində geriləmə var idi. Yol təsərrüfatında olan ağac tirlərinin 70%-i yararsız vəziyyətdə olub. Təhlükəsizlik sıfır dərəcəsində, depo və binalarımız yox vəziyyətdə idi. Başqa sözlə, hara ayaq qoyurduqsa, orada bir dərd var idi. Öz-özümə düşünürdüm ki, mən bu qədər problemlərin öhdəsindən necə gələcəyəm. Amma özümdə güc tapdım, həmkarlarımı başıma topladım və başladım işləməyə. İşimdə dəmiryolçuların təcrübəsinə arxalandım".
Sədr digər nöqsanlara da toxunub: "Bir gün əsas binamızda otaqlardan birinə girdim və gördüm ki, bir xanım yanında uşaqla əyləşib. Otaqdan bozbaş iyi gəlirdi. Xanım yeməyi radiatorun üstündə qızdırırdı. Ən pisi odur ki, radiatorun "vilka"sı da bərbad gündə idi və "vilka" ilə "razetka" bir-birinə məftillə bağlanmışdı. Mən o xanımın xətrinə dəymədim, çünki onun bu məsələdə günahı yoxdur. Günahkar bu şəraiti yaradandır".
O əlavə edib ki, cəmiyyətin fəaliyyətində tam şəffaflığın yaradılmasına nail olmaq istəyir: "Artıq mal-materialın alınmasında olan nöqsanların, pozuntuların kökünü kəsmişik. Yol ayrıcını 29 min manata alıb, 56 min manata rəsmiləşdirirdilər. Bunun kökünü kəsmək üçün nəzarəti sərtləşdirmişik. Tender proseduru keçirilmədən bir dənə də olsun kənardan mal-material gətirilə bilməz".
"Təəssüflər olsun ki, Azərbaycanda heç bir dəmir yolu hissəsi istehsal olunmur". Bunu da Cavid Qurbanov deyib.
"Biz hər bir şeyi xaricdən alırıq, istehsal edəcək bir şeyimiz yoxdur. Gələcəkdə hansısa yerli fabrik və ya zavodlarda hissələrimiz istehsal oluna bilər. Biz bu imkanları nəzərdən keçirməliyik. Bu mənada istehsalçılar da aktiv olmalıdır. Hazırda bizim istifadə etdiyimiz hissələrin əksəriyyəti Rusiya istehsalıdır. Lakin o hissələri Azərbaycanda da istehsal etmək olar. Təəssüflər olsun ki, bu barədə heç kim düşünməyib", - deyə C. Qurbanov bildirib.
Sədr əlavə edib ki, o özü şəxsən dəfələrlə yerli istehsalçılara müraciət edərək bəzi hissələrin Azərbaycanda istehsal olunmasını təklif edib: "Bir neçə dəfə müraciət etmişəm, amma mənim səsimə səs verən yoxdur. Bizdə elə bir zavod yoxdur ki, lövbər, elektrovoz motoru və sair hissələri istehsal etsin. Daxili bazarda istehsal olunan bəzi hissələr isə ya keyfiyyətsiz, ya çox baha olur, ya da bizə uyğun olmur".
C.Qurbanov bildirib ki, "bizim əsas məqsədimiz dəmiryolçuların orta aylıq əmək haqlarını 2-3 dəfə, yükdaşımaların həcmini 50% artırmaqdır".
"Əsas işimiz xidmətdir və bu xidmətin başında sərnişin və yüklərin daşınması durur. 2014-cü ildə dəmir yolu vasitəsilə 21 milyon 800 min tona yaxın yük daşınıb. Bunun təxminən 5 milyon tonu ölkədaxili yükdaşımaların payına düşür. Başqa sözlə, ucuz yükdaşıma olub. Daşınan yüklərin tonunu 5 manatdan hesablasaq, söhbət 25 milyon manatdan gedir. Yəni dəmir yolunun bizə verdiyi gəlir bu rəqəmdir. Tikinti sektorunda canlanma olduğu müddətdə dəmir yolu vasitəsilə çınqıl, daş havayı, pulsuz daşınıb. Daşımasalar daha yaxşı idi. Çünki bununla texnikalar sıradan çıxıb. 2015-ci ildə 17 milyon tondan çox daşınıb ki, bunun da 2,3 milyon tonu daxili bazarın payına düşüb. Bu ilin 8 ayı ərzində təxminən 15,5 milyon ton yük daşınıb", - deyə C. Qurbanov bildirib.
Sədr əlavə edib ki, bundan öncə düzgün aparılmayan tarif siyasəti yüklərin Azərbaycandan yan keçməsinə səbəb olub: "Lakin biz bir qədər bu prosesin qarşını ala bildik. Belə demək mümkünsə, tənəzzül bir qədər dayanıb. Yükdaşımaların həcmində artım müşahidə olunur. Hesab edirəm ki, gələn il bizim hədəfimiz 1,7 - 1,8 milyon ton yükün daşınması olmalıdır. İnkişaf mərhələli şəkildə olmalıdır. Qorbaçov siyasətinə yenidənqurma deyirdi, amma yenidənqırma oldu. Mənim müavinlərim hər gün danışıqlar aparır. Bilirsiniz ki, Türkiyə, Gürcüstan, Qazaxıstan və Ukraynada nümayəndəliklərimiz açılıb. Allah "Kaspar"a ("Xəzər Dəniz Gəmiçiliyi" QSC) insaf versin. Onlar bir az insafa gəlsələr, biz başqa ölkələrin, xüsusilə Çin, Ukrayna kimi ölkələrin yüklərinin Azərbaycan üzərindən daşınmasına nail olacağıq".
