Əli Orucov: “Bu, nəticə etibarı ilə Cənubi Qafqazın Rusiya bəlasından xilas olması deməkdir”
Azərbaycan və Türkiyə ilə elektrik verilişi xətlərinin çəkilməsi Ermənistanın enerji təhlükəsizliyinə töhfə verəcək. Bu barədə Ermənistanın Baş naziri Nikol Paşinyan İrəvanda Avropa Komissiyasının sədri Ursula Fon der Lyayenlə birgə mətbuat konfransında bildirib.
Onun sözlərinə görə, kommunikasiyaların açılması kontekstində nəqliyyat sahəsində qarşılıqlı əlaqələrin təmin edilməsi ilə yanaşı, enerji sahəsində də qarşılıqlı əlaqələrin genişləndirilməsi, o cümlədən Türkiyə və Azərbaycanla enerji əlaqələrinin inkişaf etdirilməsi vacibdir.
“Bu, elektrik verilişi xətlərinin və birləşdiricilərin çəkilməsini əhatə edir ki, bu da həm enerji təhlükəsizliyinə, həm də “yaşıl keçid”ə töhfə verə bilər”, - Paşinyan bildirib.
Sözügedən məsələni baki-xeber.com-a şərh edən AMİP funksioneri Əli Orucovun fikrincə, Ermənistanın Azərbaycan və Türkiyənin enerji şəbəkələrinə qoşulması bir sıra məsələlərdən xəbər verir: “Bu, ilk növbədə regionda müharibə, münaqişə riskini minimuma endirəcək. Adətən qarşılıqlı asılılıq bu baxımdan çox effektiv olur. Ermənistanın hər iki ölkədən iqtisadi asılılığı və bunun dərinləşməsi bir növ belə riskləri sığortalayacaq. Ermənistanın iki ölkə ilə qurulan iqtisadi əlaqələri İrəvanın Moskvadan asılılığını əhəmiyyətli dərəcədə azaldacaq. Ermənistanın avantajı odur ki, Rusiya ilə quru sərhədinə malik deyil. Əgər sərhəd olsaydı, Rusiyanın bu ölkəyə birbaşa müdaxilə riski böyük olacaqdı. Ancaq o da bir həqiqətdir ki, Ermənistanın Rusiyadan iqtisadi asılılığı əhəmiyyətli dərəcədə böyükdür. Ermənistan dəmir yolları, elektrik şəbəkəsi Rusiyanın nəzarətindədir. Ona görə Ermənistanın Rusiyadan xilas olması Azərbaycan və Türkiyə ilə normal münasibətlər qurmasından keçir. Məsələn, Ermənistan Azərbaycan hesabına qaza olan tələbatını təmin etsə, Moskva İrəvanı qazla şantaj edə bilməyəcək. Ermənistan ərazisindən keçən nəqliyyat, enerji xətləri hesabına bu ölkə həm tranzit gəlirlər əldə edəcək, həm də bu məhsullara olan tələbatını təmin edəcək. Bu isə nəticə etibarı ilə Cənubi Qafqazın Rusiya bəlasından xilas olması deməkdir. Çünki Rusiya region ölkələrini hər zaman qarşı-qarşıya qoymağa və bundan öz məqsədləri üçün istifadə etməyə çalışıb. O üzdən, çox yaxşı olardı ki, yaxın perspektivdə Rusiyanın hərbi bazaları Ermənistandan çıxarılsın”.
Vidadi ORDAHALLI
