Bəhruz Quliyev: “Qarşıdurma yaxın dövrdə də davam edəcək və hüquqi müstəvidən, siyasi müstəviyə keçməsi istisna deyil”
Ermənistanın Baş Prokurorluğunun iddiası əsasında ölkənin üçüncü prezidenti Serj Sərkisyan və onunla əlaqəli şəxslərə məxsus olduğu bildirilən qanunsuz əldə edilmiş əmlakın müsadirəsi ilə bağlı iş üzrə qərar qəbul edilib.
Qərara əsasən, Ermənistan dövlətinin xeyrinə müsadirə olunacaq əmlak arasında mənzil, avtomobil dayanacaqları və həmçinin faizlər nəzərə alınmadan təxminən 630 milyon dram (təxminən 1,7 milyon ABŞ dolları) nağd vəsait var. Məhkəmə aktı qanuni qüvvəyə mindikdən sonra əmlaklar Ermənistan Respublikasının xeyrinə müsadirə olunacaq.
Bundan başqa, erməni oliqarx və “Çiçəklənən Ermənistan” Partiyasının təsisçisi Qaqik Tsarukyanın malikanəsində hüquq-mühafizə orqanlarının əməkdaşları tərəfindən axtarış aparılıb. Bildirilir ki, ona məxsus bütün müəssisələrdə və obyektlərdə, o cümlədən idman kompleksləri və hotellərdə də istintaq tədbirləri həyata keçirilir. Başqa bir müxalifət lideri Karapetyan ev dustağıdır, sabiq prezident Köçəryanın xaricə çıxışı məhdudlaşdırılıb. Bütün bunlar Paşinyanın fəaliyyətinə necə təsir edəcək, revanşist müxalifətin yaratdığı maneələri ortadan qaldıra biləcəkmi?
Sözügedən məsələ ilə bağlı fikirlərini baki-xeber.com-la bölüşən “SƏS” qəzetinin baş redaktoru, politoloq Bəhruz Quliyev bütün bunlara bir neçə prizmadan yanaşdı: “Qeyd olunan proseslər göstərir ki, Ermənistan daxilində siyasi qarşıdurma yeni və daha sərt mərhələyə qədəm qoyub. Serj Sərkisyanın əmlakının müsadirəsi, Qaqik Tsarukyanın biznes strukturlarında aparılan istintaq tədbirləri, digər müxalif fiqurlar barəsində hüquqi məhdudiyyətlər ilk növbədə onu göstərir ki, Paşinyan hakimiyyətini möhkəmləndirir. Bunun üçün uzun illər Ermənistan siyasətinə təsir göstərmiş köhnə siyasi-elita sisteminin imkanlarını minimuma endirmək xəttini davam etdirir. Paşinyan anlayır ki, Azərbaycanla münasibətlərin normallaşdırılması, sülh gündəliyinin irəli aparılması və Ermənistanın xarici siyasət kursunda dəyişikliklərin həyata keçirilməsi üçün ən ciddi maneələrdən biri məhz revanşist dairələrdir. Keçmiş prezidentlər Serj Sarkisyan və Robert Köçəryan, eləcə də onlarla əlaqəli siyasi və maliyyə qrupları uzun illər formalaşdırdıqları təsir imkanlarından istifadə edərək hökumətin təşəbbüslərinə müqavimət göstərməyə çalışırlar. Bu baxımdan son hüquqi addımlar həm korrupsiyaya qarşı mübarizə görüntüsü yaradır, həm də siyasi rəqiblərin resurs bazasını zəiflətməyə xidmət edir”.
Politoloqun fikrincə, bununla belə, hesab etmək olmaz ki, bu addımlar revanşist müxalifəti tamamilə siyasi səhnədən çıxaracaq: “Ermənistan cəmiyyətində həmin qüvvələrin müəyyən sosial dayaqları, maliyyə imkanları və xarici əlaqələri qalmaqdadır. Ona görə də qarşıdurma yaxın dövrdə də davam edəcək və hüquqi müstəvidən, siyasi müstəviyə keçməsi istisna deyil. Digər mühüm məqam ondan ibarətdir ki, Paşinyan qarşıdakı siyasi mərhələyə mümkün qədər zəif müxalifətlə daxil olmaq istəyir. Əgər o, dövlət institutları üzərində nəzarətini gücləndirə və revanşist qüvvələrin təşkilatlanma imkanlarını məhdudlaşdıra bilsə, həm daxili islahatları, həm də Azərbaycanla sülh prosesini daha rahat davam etdirmək imkanı əldə edəcək. Hesab edirəm ki, burada incə bir məqam da var. Hüquq-mühafizə tədbirləri cəmiyyət tərəfindən selektiv ədalət kimi qəbul olunarsa, bu, əks effekt verə, müxalifətin konsolidasiyasına və Paşinyana qarşı yeni etiraz dalğasının yaranmasına səbəb ola bilər. Əgər proseslər şəffaf hüquqi əsaslarla aparılarsa, hökumətin mövqeyi güclənəcək. Əks halda isə siyasi təqib ittihamları Ermənistan daxilində gərginliyi daha da artıracaq.
Hazırda Ermənistan daxilində gedən proseslər təkcə korrupsiyaya qarşı mübarizə deyil, həm də gələcək siyasi konfiqurasiyanın müəyyənləşdirilməsi uğrunda mübarizə kimi qiymətləndirilməlidir. Bu mübarizənin nəticəsi Ermənistanın daxili siyasi sabitliyinə, Azərbaycanla sülh gündəliyinin taleyinə və regionun gələcək geosiyasi mənzərəsinə birbaşa təsir göstərəcək. Paşinyan revanşist düşərgənin imkanlarını müəyyən qədər zəiflədə bilər. Lakin onların tamamilə siyasi səhnədən silinəcəyini söyləmək hələ tezdir. Bunun üçün yalnız hüquqi addımlar deyil, cəmiyyətin dəstəyinin qorunması və iqtisadi-sosial nəticələrin əldə olunması həlledici amil olacaq”.
Vidadi ORDAHALLI
