Ermənistanda məhkəmə müxalif "Çiçəklənən Ermənistan" partiyasının lideri, milyarder Qaqik Tsarukyan barəsində iki aylıq həbs-qətimkan tədbiri seçib. O, irimiqyaslı dələduzluq və çirkli pulların yuyulmasında ittiham olunur. Vəkilləri ittihamların əsassız olduğunu və qərardan şikayət verəcəklərini bildirib.
Tsarukyan evində 12 saat davam edən axtarışdan sonra saxlanılıb. Milli Təhlükəsizlik Xidmətinin əməkdaşları əvvəlcə onu İstintaq Komitəsinə apararaq rəsmi ittiham irəli sürüb, daha sonra isə qandallı vəziyyətdə məhkəməyə gətiriblər. İstintaq Komitəsinin məlumatına görə, Tsarukyan İran və Ermənistan arasında logistik əlaqələr qurmaq bəhanəsi ilə cinayətkar qrup yaradaraq ona rəhbərlik edib. Həmin qrupun sənədləri saxtalaşdırmaq və aldatma yolu ilə İran şirkətlərindən 52 nəqliyyat vasitəsi, avadanlıq və mal-mülk mənimsədiyi, qarşı tərəfə təxminən 22 milyon dollar ziyan vurduğu iddia olunur. İstintaqın versiyasına görə, Tsarukyan daha sonra bu vəsaitlərin yuyulmasını təşkil edib. Siyasətçi özü isə ittihamları rədd edərək hadisələrin siyasi motivli və saxta olduğunu bildirir. Tsarukyanın tərəfdarlarına görə, hüquq-mühafizə qurumları baş nazir Nikol Paşinyanın şəxsi göstərişi ilə hərəkət edir. "Çiçəklənən Ermənistan" partiyası son parlament seçkilərində cəmi bir neçə on səs fərqi ilə parlamentdən kənarda qalıb. Bu siyasi qüvvə, eləcə də Robert Köçəryanın "Hayastan" bloku və Samvel Karapetyanın "Güclü Ermənistan" partiyası rusiyayönümlü hesab olunur. Seçkilərdə qalib gələn baş nazir Paşinyan isə təşviqat kampaniyası zamanı kəskin ifadələr işlədərək Koçaryan, Karapetyan və Tsarukyanı həbsxanaya göndərəcəyi ilə hədələmişdi. Hazırda hər üç şəxs barəsində cinayət işi açılsa da, hələlik yalnız Tsarukyan istintaq təcridxanasına göndərilib. Müxalif qüvvələr bu həbsi kəskin pisləsələr də, Paşinyan baş verənlərə hələlik heç bir rəsmi reaksiya verməyib. Amma tezliklə digər müxaliflərin də həbsə atılması gözlənilir.
İndilikdə isə, vəkil Yerem Sarkisyanın sözlərinə görə, məhkəmədə Tsarukyanın ittihamlarını əsaslandırmaq üçün edilən bütün cəhdlər uğursuz olub. Məhkəmə iclası ictimaiyyət üçün qapalı keçirilib. İttiham tərəfi həmçinin media ilə əlaqə saxlamayıb: "İran məhkəməsi yekun qərarla vətəndaşlarının yazdıqlarının yalan olduğunu təsdiqləyir, burada heç bir dələduzluq cinayəti yoxdur, bunlar adi işgüzar münasibətlərdir. Ermənistan hüquq-mühafizə sistemi deyir ki, yox, bu yenə də cinayətdir, dələduzluqdur. Burada Tsarukyanı həbs etmək üçün fürsətin olduğu açıq-aydın görünürdü". Parlamentə daxil olan bir sıra müxalifət qüvvələri, o cümlədən "Hayastan" və "Güclü Ermənistan" blokları Tsarukyana qarşı başlanan cinayət işi və ona məxsus şirkətlərdə aparılan axtarışlarla bağlı şərh verib. Onların qiymətləndirməsinə görə, Tsarukyan siyasi səbəblərdən təqib olunur. Robert Köçəryanın rəhbərlik etdiyi qüvvələrin bəyanatında deyilir: "Aydındır ki, hakim rejim bu cür hərəkətlərlə legitimlik böhranını ört-basdır etməyə və dövlət əleyhinə məqsədlərə çatmaq yolunda bütün mümkün müqavimət mənbələrini aradan qaldırmağa çalışır". Demək olar ki, eyni qiymətləndirməni "Güclü Ermənistan" da verib: "Bu, ölkədə davam edən kütləvi siyasi təqiblərin daha bir nümunəsidir. Mövcud hakimiyyət tərəfindən davam edən repressiyaların əsas məqsədi müxalifət qüvvələrini susdurmaqdır. Hüquq-mühafizə sistemindən siyasi silah kimi istifadə ölkə iqtisadiyyatına və investisiya mühitinə ağır zərbə vurur".
Tahir TAĞIYEV
