ABŞ-ın İranda 80-dən çox məntəqəni hədəf alan hava hücumları Yaxın Şərqdə gərginliyi artırıb. Hücumlardan sonra İran Parlamentinin sədri Məhəmməd Baqir Qalibaf ABŞ-ın bir çox sahədə İranla anlaşma memorandumunu pozduğunu bildirib. İran İnqilab Keşikçiləri Korpusunun (SEPAH) Xatəmül-Ənbiya Mərkəzi Qərargahı ABŞ-ın təcavüzkar hərəkətlərinə sarsıdıcı cavab veriləcəyini açıqlayıb.
Qalibaf sosial media hesabında verdiyi açıqlamada anlaşma memorandumunu pozulmasını Hörmüz boğazında İran razılaşmalarına əməl edilməməsi, yeni hücumlarla bağlı daimi təhdidlər, neft sanksiyalarının yenidən tətbiqi, İranın cənubuna hücumlar və Livana qarşı davam edən İsrail təcavüzü kimi qiymətləndirib.
Qalibaf İranın bütün bu pozuntulara qarşı səssiz qalmayacağını vurğulayıb: "Zorakılıq və şantaj dövrü bitdi. Bu yol heç bir yerə aparmır. Biz təslim olmayacağıq".
Qeyd edək ki, ABŞ ordusu İranın Hörmüz boğazından keçən ticarət gəmilərinə son hücumlarına cavab olaraq İrana hücum edib. 80-dən çox İran hərbi hədəfinə zərbə endirilib. ABŞ Mərkəzi Komandanlığı (CENTCOM) Tehran rejiminə cavab zərbələri endirildiyini təsdiqləyib: "ABŞ qüvvələri İranın beynəlxalq ticarət dəhlizindəki ticarət gəmilərinə hücum etmək qabiliyyətini zəiflətmək məqsədilə Hörmüz boğazında və ətrafında İranın hava hücumundan müdafiə sistemlərinə, komandanlıq və idarəetmə bazalarına, sahil radar qurğularına, gəmi əleyhinə raket imkanlarına və 60-dan çox kiçik İran İslam İnqilabı Keşikçiləri Korpusunun gəmilərinə zərbələr endirib".
İranın bu yaxınlarda Hörmüz boğazından keçən üç ticarət gəmisinə, o cümlədən Marşal adaları bayrağı altında üzən "M/T Al Rekayyat", Səudiyyə Ərəbistanı bayrağı altında üzən "M/T Wedyan" və Liberiya bayrağı altında üzən "M/T Cyprus Prosperity" gəmilərinə hücum etdiyi bildirilib və əlavə edilib ki, İran qüvvələrinin bu əsassız təcavüzü atəşkəsin açıq və təhlükəli şəkildə pozulmasıdır və naviqasiya azadlığını pozur.
SEPAH isə hücumlara cavab olaraq ABŞ-ın Bəhreyn və Küveytdəki hərbi mövqelərini zərbələr endirib. “Ötən gecə ABŞ ordusu İranın cənubunda Hörmüzqan vilayəti sahillərində qeyri-hərbi stansiyaları və sahil bazalarının bir neçəsinə hücum edərək atəşkəsi və İslamabad anlaşma memorandumunu açıq-aşkar şəkildə pozub”, -deyə SEPAH) yaydığı bəyanatda bildirilir.
Qeyd olunur ki, SEPAH bu hücuma reaksiya olaraq PUA və raketlərlə Bəhreyn və Küveytdə ABŞ-nin 85 önəmli hərbi obyektini atəşə tutub. Eyni zamanda hücum etməyə cəhd edən ABŞ-nin MQ9 PUA-sı vurulub.
Tahir TAĞIYEV
