Oqtay Haqverdiyev: "Avtomobil zavodunda istehsal olunacaq minik vasitələrinin satış qiyməti ucuz olarsa, təbii ki, tələbat yüksək olacaq"
Azərbaycanla İranın Neftçalada inşa edəcəyi birgə avtomobil zavodunun istehsalı olacaq ilk avtomobil 2017-ci ilin mayında satışa çıxarılacaq. Bu barədə yerli mətbuata məlumat verən İranın sənaye nazirinin müavini Cəfər Sərcani qeyd edib ki, ilkin mərhələdə zavodda istehsal olunacaq avtomobil İrandan gətirilən hissələrdən yığılacaq. İkinci mərhələdə isə Neftçalada ehtiyat hissələrinin istehsalına başlanacaq və avtomobil tam olaraq Azərbaycanda hazırlanaraq satışa çıxarılacaq.
Nazir müavini deyib ki, 15 milyon dollar dəyərində olan bu layihəni Azərbaycanın "AzEuroCar LLC" şirkəti ilə İranın "Khodro" şirkəti həyata keçirəcək. Zavodun inşası üçün Neftçalada 10 hektar ərazi ayrılıb və tikinti işləri sürətlə davam edir.
Zavodda hər il 10 min avtomobilin istehsalı nəzərdə tutulub.
Azərbaycan və İranın Neftçalada birgə inşa edəcəyi avtomobil zavodu və bu zavodda yığılacaq minik vasitələrinin ölkə iqtisadiyyatına təsiri barədə məlumat verən iqtisadçı-ekspert Oqtay Haqverdiyev "Bakı-Xəbər"ə açıqlamasında bunları dedi: "Avtomobil zavodunun açılması çoxlu sayda insanın işlə təmin olunması deməkdir. Neftçalada açılacaq avtomobil zavodunda maşın istehsal olunmayacaq, detallar İrandan gətiriləcək və bizdə o maşın yığılacaq. İran və Azərbaycanın birgə istehsal edəcəyi maşınların bazarının olub-olmaması maraqlıdır. Əgər hazırlanacaq minik vasitələrinin satış qiyməti ucuz olarsa, təbii ki, tələbat yüksək olacaq. Ancaq onu da unutmaq lazım deyil ki, İran avtomobilləri dünya bazarında tanınmır. Hər məhsulun və ya daşınmaz əmlakın öz bazarı olmalıdır. Dünya bazarında avtomobil istehsalçısı hər kəsə bəllidir. Bu sahədə Yaponiya, Almaniya və digər ölkələri misal göstərə bilərik.
Hər hansı bir nəsnə istehsal olunarkən ona bazarda necə reaksiya olacağı araşdırılmalıdır. Həmin maşınların alıcısının olub-olmaması sual doğurur. 1990-cı illərdə İranda yığılan minik vasitələri Azərbaycana gətirildi. Həmin maşınlar, demək olar ki, heç bir ay işləmədi. Onu da unutmaq lazım deyil ki, artıq müasirliyə meyl göstəririk. Ancaq İran isə hələ də köhnə texnologiya ilə fəaliyyətini davam etdirir".
Günel CƏLİLOVA
