"Azərbaycanda ən azı 10 min tona qədər barama istehsal etmək imkanı var"
Xəbər verildiyi kimi, Prezident İlham Əliyev Azərbaycan Respublikasında ipəkçiliyin inkişafına dövlət dəstəyi haqqında Sərəncam imzalayıb. Məqsəd ölkədə kənd təsərrüfatının ənənəvi sahələrindən olan ipəkçiliyin inkişafına dövlət dəstəyini gücləndirmək, bu sahənin potensial imkanlarından səmərəli istifadə etmək, rəqabət qabiliyyətini və barama istehsalı ilə bağlı əhalinin məşğulluğunu artırmaq, marağını gücləndirmək və sosial rifahını daha da yaxşılaşdırmaqdır.
Sərəncamda bildirilir ki, barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi yaş baramanın hər kiloqramına görə subsidiya müəyyən edilsin.
Nazirlər Kabinetinə barama istehsalı ilə məşğul olan şəxslərə barama emalı və ipək istehsalı müəssisələrinin qəbul etdiyi yaş baramanın hər kiloqramına görə növündən asılı olaraq veriləcək subsidiyanın məbləğini və verilmə qaydasını Azərbaycan Respublikasının Prezidenti ilə razılaşdırmaqla iki ay müddətində təsdiq etmək, bu sərəncamdan irəli gələn digər məsələləri həll etmək tapşırılıb.
Ölkədə qeyri-neft sektorunun, o cümlədən kənd təsərrüfatının inkişafı prioritetdir. Nazirlər Kabinetinin 2016-cı ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında çıxışı zamanı ölkə başçısı bildirdi ki, baramaçılıq kimi çox vacib olan kənd təsərrüfatı sahəsini də itirmişik: "Həmçinin baramaçılıq sektoru da inkişaf etməlidir. Sovet vaxtında bir sıra rayonlarda bu sahə çox uğurla inkişaf edirdi, bol məhsul əldə olunurdu və insanlar yaxşı pul qazanırdılar".
Bu baxımdan barama istehsalı ilə məşğul olan şəxslərə bununla əlaqədar subsidiyanın ayrılması sözügedən sahənin inkişafına necə təsir göstərəcək?
Məsələyə münasibət bildirən kənd təsərrüfatı üzrə mütəxəssis Çingiz Fərəcov sözügedən qərara müsbət prizmadan yanaşdı: "Baramaçalıq evdə iş formalarından biri hesab olunur. Sovet dövründə evdar qadınları işə cəlb etmək məqsədilə barama yetişdirilirdi. Barama yetişdirilməsi üçün həm də saraylar tikilmişdi. Amma barama istehsalının 99 faizi şəxsi evlərdə aparılırdı. Barama 40-45 günə yetişir. İpəkqurduna lazım olan qida maddələri tut ağacının yarpaqlarıdır. Xüsusən də cavan tut ağacının yarpaqları lazımdır. Barama əsasən may ayından iyunun 10-a qədər yetişdirilməlidir. Çünki o dövrdə tut ağacının yarpağı çox zərif olur, qurd onu asanlıqla yeyə bilir. Vaxtilə kəndlərdə hər adama bir qutu barama verilirdi. Bu da 17 qram toxum deməkdir. O toxum yedizdirilir və süfrələrdən qurdlar əmələ gəlir. Qurdlar da tut yarpağını yeməklə böyüyür. Sovet dövründə rayonlara tapşırıqlar verilirdi. Rayonlar su kənarlarında tut ağacı əkirdi. Bunlar da böyük bir bağı xatırladırdı. Qurdlar onu yeyərək böyüyüb barama əmələ gətirir. Vaxtilə Bərdə rayonunda bütün su arxlarını kənarında tut ağacı əkilmişdi. Həmin ağacların hesabına Bərdə rayonu 800 tona qədər barama verirdi. Sovet dönəmində maksimum 5 min 600 ton barama Azərbaycanda istehsal olunub. Ona görə də 5 min 600 ton böyük göstərici idi. Azərbaycanda vaxtilə iki böyük ipəkçilik fabriki olub. Bunlardan biri Şəkidə fəaliyyət göstərirdi ki, orada 8 min insan işləyirdi. Naxçıvanın Ordubad rayonunda da barama açan fabrik var idi. Prezidentin baramaçılığın inkişafı ilə bağlı sərəncam verməsi yaxşı haldır. Subsidiyanın verilməsinin müsbət tərəfi odur ki, hamı barama istehsalında maraqlı olacaq. Belə ki, 3 otağı olanlar bir otağını ayırırlar baramanın yetişdirilməsinə. Ona görə də bunun müsbət effekti olacaq. Azərbaycanda ən azı 10 min tona qədər barama istehsal etmək imkanı var".
Vidadi ORDAHALLI
