Bəlli olduğu kimi, Azərbaycanda turizm özünün yeni yüksəliş mərhələsini yaşayır. Ölkəyə gələn turistlərin sayı artır və bu prosesin davamlı xarakter alması gözlənir. Otellər, xidmət obyektləri, iaşə müəssisələri də artan turizm axınından məmnunluqlarını ifadə edir.
Hazırda Azərbaycana daha çox müxtəlif ərəb ölkələrindən turistlər üz tutur. Ərəb ölkələrindən gələn məlumatlar isə düşünməyə əsas verir ki, həmin turistlərin sayı daha da artacaq. Məşhur "Arabian Gazette" bu fonda yazır ki, Azərbaycanda viza alınması prosedurunun bu yaxınlarda sadələşdirilməsi sayəsində Birləşmiş Ərəb Əmirliyi (BƏƏ) və Fars körfəzi ölkələrindən gələn qonaqların sayı 30 dəfə artıb. Nəşr yazır ki, ərəb ölkələrinin bir çox sakini Azərbaycana gəlməyə hazırdır və bu amil ölkənin turizm potensialının artımını stimullaşdırır: "Ölkənin ən çox ziyarət edilən şəhəri Bakı olub. Digər cəlbedici səyahət istiqamətləri Qəbələ, Naftalan, Şahdağ, Quba, İsmayıllı, Qax və Zaqataladır".
Ərəb turistlərin sayının artması isə iqtisadiyyatın bir çox sahələrinə ciddi təsir göstərib və yuxarıda qeyd olunduğu kimi, xidmət sektoru bundan məmnunluq ifadə edir. Bundan əlavə, ərəblər artıq daşınmaz əmlak bazarına da ciddi maraq göstərir. Lakin proseslər təkcə bununla yekunlaşmır. BƏƏ-nin Azərbaycandakı səfiri Məhəmməd Əhməd Hamil Əl-Qubaisinin açıqlamaları turist axının Azərbaycanda iqtisadiyyatın digər sahələrinə də müsbət təsir göstərəcəyini deməyə əsas verir. Onun sözlərinə görə, Azərbaycanda ərəb turistlərinin sayının xeyli artması iki ölkə arasında səmərəli əməkdaşlıq və qardaş münasibətlərinin nəticəsidir: "Mən bura gələn turistlərlə söhbət edirəm. Əmirlik sakinləri səyahət etməyi sevir. Biz dünyanın bir çox yerlərində olmuşuq, lakin Azərbaycanın xüsusi yeri var".
Səfir qeyd edib ki, ərəb turistləri arasında Azərbaycanda biznes qurmaq istəyən şəxslər də var:"Azərbaycan Prezidenti İlham Əliyev tərəfindən yaradılan biznes şəraiti investorlar üçün əlverişlidir. BƏƏ-dən investorlar daha çox qeyri-neft sektoruna, xüsusilə kənd təsərrüfatı sahəsinə sərmayə qoyuluşunda maraqlıdır. BƏƏ-nin böyük hissəsi səhradır, Azərbaycan isəamünbit torpaqlara malikdir". Səfir, həmçinin vurğulayıb ki, Azərbaycan və BƏƏ arasında ticarət əlaqələrinin yüksək göstəricilərinin əldə olunması üçün səylərini əsirgəməyəcək: "Mən inanıram ki, Azərbaycan hökumətinin dəstəyi ilə biz yaxın zamanlarda yeni uğurlar qazanacağıq".
Beləliklə, Azərbaycana həm də ərəb investisiya kapitalının axınını gözləmək olar. Amma Azərbaycana sərmayə yatırmaqda təkjə BƏƏ maraqlı deyil. Bir müddət əvvəl Bakıda Azərbaycan-Səudiyyə Ərəbistanı biznes-forumu keçirilib. Biznes forum Səudiyyə Ərəbistanı Krallığının ticarət və sənaye naziri Tavfig Favzan Alrabiahın rəhbərlik etdiyi nümayəndə heyətinin ölkəmizə səfəri çərçivəsində baş tutub. İqtisadiyyat və Sənaye Nazirliyinin dəstəyi, AZPROMO-nun təşkilatçılığı ilə keçirilən biznes forumda iqtisadiyyatın müxtəlif sahələrini təmsil edən 100-dən artıq Səudiyyə Ərəbistanı şirkəti iştirak edib. Həmin şirkətlər də Azərbaycana sərmayə yatırımında maraqlı tərəf kimi çıxış edirlər. Ümumiyyətlə, son zamanlar Azərbaycanla Səudiyyə Ərəbistanı arasında əlaqələr daha sürətlə inkişaf etməyə başlayıb. Bu fonda gözlənir ki, ərəb dünyasından Azərbaycana kapital axını da başlasın. Hər halda, Azərbaycana çoxsaylı Səudiyyə Ərəbistanı şirkətlərinin gəlişi də bunun ilk işartısı ola bilər. Ekspertlər hesab edir ki, ərəb kapitalının Azərbaycana cəlb edilməsi imkanları nisbətən asandır. Bir tərəfdən Azərbaycanla ərəb ölkələrinin münasibətləri yaxşıdır. Digər tərəfdən isə ərəb kapitalı yeni bazar axtarır və Azərbaycan ərəb kapitalı üçün yeni bazar rolunu oynaya bilər. Kapitalın cəlb edilməsi həm də investisiya mühitinin yaxşılaşdırılmasını tələb edir. Ərəb kapitalının cəlb edilməsi üçün də Azərbaycanda investisiya mühitinin kifayət qədər yaxşılaşdırıldığı artıq danılmaz həqiqətdir. Hesab edilir ki, ərəb kapitalına yeni layihələr təklif olunmalıdır. Bu istiqamətdə atılan addımlar ərəb ölkələrindən Azərbaycana daha çox sərmayə axınını da təmin edəcək. Bu gün ölkədə elə dövlət müəssisələri var ki, onların özəlləşdirilməsində xarici kapitalın, o cümlədən ərəb kapitalının marağı ola bilər. Eləcə də aqrar sahəyə vəsait yatırmaqda ərəblər kifayət qədər maraqlıdır. Bütün bunlar isə, öz növbəsində, Azərbayxana əlavə iqtisadi dividendlər vəd edir.
Tahir TAĞIYEV
