"Sahibkarlar tərəfindən həmin müəssisələrin işlədilməsi, istər-istəməz, regionlarda yaşayan əhalinin güzəranına müsbət təsir edəcək"
Əmlak Məsələləri Dövlət Komitəsi tərəfindən dövlət əmlakının özəlləşdirilməsi ilə bağlı növbəti hərrac elan edilib. Hərraclarda ümumilikdə 51 dövlət əmlakı özəlləşdirilməyə çıxarılıb. Hərraca çıxarılan əmlaklardan 25-i respublikanın müxtəlif bölgələrində yerləşən və nizamnamə kapitalının nəzarət səhm paketinin 30-45 faizini təşkil edən açıq səhmdar cəmiyyətləridir. Bu səhmdar cəmiyyətləri iqtisadiyyatın müxtəlif sahələri, o cümlədən sənaye, inşaat, nəqliyyat, xidmət və s. sahələri əhatə edir.
Kiçik dövlət müəssisə və obyektlərinin özəlləşdirilməsi ilə bağlı elan edilən hərraca isə, Bakı şəhəri ilə yanaşı, Mingəçevir şəhəri, Daşkəsən, Qəbələ, Xaçmaz, Qax və Oğuz rayonunda yerləşən 26 əmlak çıxarılıb. Hərraca çıxarılan kiçik dövlət müəssisələri sırasında müxtəlif sahələri olan xidmət, ticarət, ictimai iaşə, avtotəmir və digər müəssisələr var. Hərraca çıxarılan daşınmaz dövlət əmlaklarının iqtisadi göstəriciləri barədə məlumatlar, mövcud vəziyyətini əks etdirən fotomateriallar, yerləşmə mövqelərini göstərən xəritələr (google map) privatization.az saytında yerləşdirilir. Saytda hərraca çıxarılan hər bir səhmdar cəmiyyəti barədə ətraflı məlumat var.
Qeyd edək ki, bu hərraclar 27 sentyabr, saat 11:00-da keçiriləcək. Hərraclarda iştirak etmək üçün elektron qaydada da sifariş göndərmək mümkündür. ƏMDK yerli və xarici investorları, sahibkarları, iş adamlarını və mülkiyyət sahibi olmaq istəyən hər bir kəsi özəlləşmədə fəal iştirak etməyə dəvət edir.
Ümumilikdə sözügedən dövlət əmlakının özəlləşdirilməyə çıxarılması regionlarda məşğulluğun təmin olunmasında, işsizliyin azalmasında nə kimi rol oynayacaq? Məsələyə münasibət bildirən ekspert Zakir Əhmədovun sözlərinə görə, özəlləşdirmə kampaniyası regionların iqtisadi inkişafına müsbət təsir edə bilər: "Bir sıra müəssisələr, xidmət sahələri dövlətin balansında olduğu üçün onlar fəaliyyət göstərə bilmir. Bunun müxtəlif səbəbləri var. Ancaq, istənilən halda, həmin müəssisələr özəlləşdirilməyə çıxarılandan sonra yerli və xarici sahibkarlar buna maraq göstərəcək. Elə sahibkar ola bilər ki, özəlləşdirmədə pay aldıqdan sonra müəssisənin profilini dəyişsin. Bu zaman da yeni iş yerləri yaranacaq. Sahibkarlar tərəfindən həmin müəssisələrin işlədilməsi, istər-istəməz, regionlarda yaşayan əhalinin güzəranına müsbət təsir edəcək. Buna görə bir çoxları işlə təmin olunacaq. Daha paytaxta və yaxud da xarici dövlətlərə iş dalınca getməyə ehtiyac yaranmayacaq. Nəticədə regionların əmək bazarında bir canlanma yaranacaq. Bu həm də ölkədə qeyri-neft sektorunun inkişafı deməkdir". Vidadi ORDAHALLI
