"Təşkilat ölkələrdə yerli istehsalın artırılmasına böyük önəm verir"
Azərbaycan Ümumdünya Ticarət Təşkilatına (ÜTT) ölkədə kənd təsərrüfatına dəstək məqsədilə 1 milyard dollar ayrılmasını, işğal altında olan torpaqların azad edilməsindən sonra isə həmin ərazilərdə kənd təsərrüfatının bərpası üçün əlavə 1 milyard dollar ayrılmasını təklif edib.
Bunu açıqlamasında Azərbaycan xarici işlər nazirinin müavini Mahmud Məmmədquliyev iyul ayında İsveçrənin Cenevrə şəhərində ölkənin ÜTT-yə daxil olması üzrə aparılan danışıqların növbəti mərhələsini şərh edərkən bildirib. Onun sözlərinə görə, Cenevrədə işçi qrupunun iclasında Azərbaycanın xarici ticarət rejimi müzakirə edilib: "Orada artıq bu məsələ, hansı öhdəliklər götürməyimizin zəruri olması və s. ilə bağlı sənədlər hazırlanır. İclas kifayət qədər fəal keçdi, Avropa İttifaqı, ABŞ və digər ölkələr tərəfindən çoxlu suallar oldu. Hələ ki, onlardan yazılı cavab gözləyirik. Əsas məsələ bizim yerli kənd təsərrüfatına dəstək üzrə təkliflərimizlə bağlıdır. ÜTT-nin sənədlərinə əsasən hesab edirik ki, belə desək, "sarı səbət"dən (amber box) istifadə etmək hüququna malikik.
Hesab edirik ki, ÜDM-in 10 %-ni kənd təsərrüfatını maliyyələşdirmək üçün ayıra bilərik. Amma ÜTT bu fikirlə razı deyil, onlar bu göstəricinin təxminən 5 % olmasını istəyir. Biz indi onlardan ölkədə kənd təsərrüfatına dəstək məqsədilə 1 milyard dollar ayrılmasını, işğal altında olan torpaqların azad edilməsindən sonra isə həmin ərazilərdə kənd təsərrüfatının bərpası üçün əlavə 1 milyard dollar ayrılmasını istəyirik. Hələlik ÜTT 5 % verməyə hazır olduqlarını bildirib, amma baxacağıq".
Azərbaycanın tələb etdiyi məbləğ ayrılarsa, bunun kənd təsərrüfatının inkişafına nə kimi təsiri olar?
İqtisadçı Günel Fərhadqızı qəzetimizə açıqlamasında bildirdi ki, Prezident İlham Əliyevin son illərdə imzaladığı fərman və sərəncamlar, qəbul edilmiş qanunlar, qərar və qaydalar aqrar sektorda iqtisadi fəallığın yüksəlməsinə səbəb olub: "Azərbaycanda son illər qeyri-neft sektorunun inkişafına böyük önəm verilir. Xüsusilə də prioritet sahə kimi kənd təsərrüfatı önə çıxıb. Cari ilin birinci yarısında kənd təsərrüfatında 3,1 faiz artım qeydə alınıb. İlin sonuna qədər və növbəti illərdə kənd təsərrüfatında çox böyük irəliləyişin olacağı da istisna edilmir. Dünya Bankının 2016-2018-ci illər üçün proqnozlaşdırılan məlumatında da respublikamızda kənd təsərrüfatının inkişaf tempi qeyd olunub. Bildirilib ki, sözügedən sahə üzrə 2016-cı ildə 4,2 faiz, 2017-ci və 2018-ci illərdə isə hər il 4 faiz olmaqla artım gözlənir. Proqnoza görə, görülən işlərin, həyata keçirilən layihələrin uğurla icrası nəticəsində isə ilin sonuna aqrar sektorda istehsalın həcmində ən azı 6 faiz artımın olacağı proqnozlaşdırılır.
Prezident İlham Əliyev Nazirlər Kabinetinin son iclasında ölkəmizdə aqrar sektorun ən mühüm və ənənəvi sahələrinə diqqəti artırmağı tövsiyə edib. Bu il Azərbaycanın 19 rayonunda 40 min hektardan artıq sahədə yaradılan 30 iri fermer təsərrüfatının fermerlərinə 60,6 milyon manat güzəştli kredit verilib. Həmin təsərrüfatlarda müasir suvarma sistemləri qurulub. Bunun nəticəsində hər hektardan məhsuldarlıq arpa və buğda üzrə 60 sentnerədək, qarğıdalıda isə 120 sentnerədək təşkil edib. Konkret rəqəmlərlə inkişaf tempini daha aydın göstərmək olar. Ancaq bu inkişafın davamlı olması üçün ÜTT-nin verəcəyi kreditin böyük önəmi ola bilər. Təşkilat ölkələrdə yerli istehsalın artırılmasına böyük önəm verir. Bu baxımdan da, yəqin ki, Azərbaycan tərəfinin istəyinə müsbət cavab verəcək. Hesab edirəm ki, həmin vəsait ölkəmizdə kənd təsərrüfatının inkişaf tempini daha da artırar".
Məhəmmədəli QƏRİBLİ
