Kamran Məmmədli: “İqtisadiyyatdakı qapanmaların ən ciddi fəsadı işsizliyin böyük miqyasda genişlənməsi oldu”
Açıqlanan statistik rəqəmlərə əsasən, 2021-ci il iyulun 1-nə olan məlumata əsasən, Azərbaycanda iqtisadi fəal əhalinin 6,64 faizi işsizdir.
Bu tarixdə 5,28 milyon nəfər iqtisadi fəal əhali olub. Onun 4,929 milyon nəfərini məşğul əhali, 350 min nəfərini işsiz əhali təşkil edib.
- “İqtisadiyyatın elə sahələri var ki, orada qeyri-rəsmi işləyənlər üstünlük təşkil edir, bu fakt da statistikaya öz təsirini göstərir”
Işsiz əhalinin sayının artması barədə fikir bildirən iqtisadçı ekspert Kamran Məmmədli qeyd etdi ki, ötən illərlə müqayisədə işsizliyin səviyyəsinin artmasının məlum səbəbləri var: “Belə ki, iqtisadiyyatdakı qapanmaların ən ciddi fəsadı işsizliyin böyük miqyasda genişlənməsi oldu. Azərbaycanda işsizliyin ümumiyyətlə problem olmadığı görünsə də, rəsmi statistikada işsizlik səviyyəsinin ayrı-ayrı illərdə 4-5 faizi ötmədiyi əks olunsa da, yaranmış dərin böhranda problemi gizlətməyin mümkün olmayacağı lap əvvəldən bəlli idi. Pandemiyanın, karantin rejiminin gətirdiyi özəlliklərdən biri bu oldu ki, ölkədə işsizliklə bağlı rəqəmlər, hətta ən yüksək səviyyədə belə, tənqid olundu. Bununla da indiyə kimi açıqlanan məlumatların doğru olmadığı, məlumatlarda problemlər olduğu aşkara çıxdı. Məlum oldu ki, işsizlərin sayı açıqlanan rəsmi rəqəmlərdən xeyli çoxdur. Pandemiya dövründə işsizlərə yardım kimi 600 min nəfərə 190 manat verildi”.
Həmsöhbətimiz onu da əlavə etdi ki, ölkəmizdə qeyri-rəsmi iş yerləri də çoxdur. İqtisadiyyatın elə sahələri var ki, orada qeyri-rəsmi işləyənlər üstünlük təşkil edir. Bu fakt da statistikaya öz təsirini göstərir: “İctimai iaşə sektorunda da qeyri-rəsmi çalışanların sayı olduqca çoxdur və bu şəxslər uzun müddət işləməyib”.
Günel CƏLİLOVA
