Ötən il bir sıra ölkələr büdcədən koronavirusla mübarizəyə vəsait ayırmaqda çətinlik çəkdiyi halda, Azərbaycanda dövlət büdcəsi vəsaitlərinin 7,5 faizi koronavirusla mübarizəyə xərclənib. Belə ki, Azərbaycan hökuməti koronavirusa qarşı mübarizə və ölkədəki sosial-iqtisadi vəziyyətdəki mənfi nəticələrin aradan qaldırılması üçün tədbirlərə təxminən 2 milyard manat və ya dövlət büdcəsinin xərc hissəsinin 7,5 faizini xərcləyib.
Həmin vəsaitdən 612,5 mln. manatı koronavirusla mübarizə tədbirlərində iştirak edən tibb işçilərinə əlavənin ödənilməsinə, zəruri tibbi ləvazimatların və avadanlıqların, dərman vasitələrinin alınmasına, çarpayı fondunun artırılması və ixtisaslaşmış xəstəxanaların fəaliyyətinin təmin edilməsinə, karantin nəzarətinə götürülmüş şəxslərə karantin müəssisələrində göstərilən xidmətlərlə bağlı xərclərin ödənilməsinə yönəldilib. Bununla yanaşı, qlobal pandemiya ilə bağlı dünya enerji və səhm bazarlarında baş verən kəskin dalğalanmaların Azərbaycan Respublikasının iqtisadiyyatına, makroiqtisadi sabitliyə, ölkədə məşğulluq məsələlərinə, sahibkarlıq subyektlərinə mənfi təsirinin azaldılması ilə bağlı tədbirlərin maliyyələşdirilməsi üçün 1334,1 mln. manat vəsait sərf olunub. Qeyd olunan vəsait hesabına pandemiyadan zərər çəkmiş sahələrdə fəaliyyət göstərən sahibkarlıq subyektlərinə dəstək məqsədilə özəl sektorda çalışan 243 min nəfərdən çox işçinin əməkhaqqının müəyyən hissəsinin ödənilməsi, 107 mindən çox fərdi (mikro) sahibkara maliyyə dəstəyinin göstərilməsi, sahibkarlıq subyektlərinə bank kreditləri üzrə dövlət zəmanətinin verilməsi və kredit faizlərinin subsidiyalaşdırılması, sahibkarlığın inkişafına əlavə dövlət dəstəyinin göstərilməsi və digər xərclərin maliyyələşdirilməsi təmin edilib.
Göründüyü kimi, pandemiyanın fəsadlarının neytrallaşdırılması üçün büdcədən əhəmiyyətli həcmdə vəsait ayrılıb.
“Büdcədən bu məqsədlə ayrılan vəsait pandemiyanın yaratdığı fəsadların yüngülləşdirilməsində mühüm rol oynadı”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-alim Əli Əlirzayevin sözlərinə görə, büdcə xərcləri çərçivəsində koronavirusla mübarizəyə əhəmiyyətli dərəcədə vəsaitin ayrılması Azərbaycanın sosial dövlət olmasından irəli gəlir: “Azərbaycan sosialyönümlü dövlət olduğundan, bu siyasət prioritet əhəmiyyət kəsb edir. Digər tərəfdən, pandemiya elə bir bəladır ki, bunun qarşısını almaq üçün vəsait lazımdır. Çünki bütün insanların vəsaiti yoxdur ki, öz imkanları hesabına buna qarşı mübarizə aparsınlar. O üzdən, Azərbaycan dövləti bütün bunları nəzərə alaraq büdcədən koronavirusla mübarizəyə böyük vəsait ayırdı. Sahibkarlara, fermerlərə subsidiya şəklində yardımlar edildi. Başqa bir tərəfdən, sərt karantin tədbirləri ilə əlaqədar olaraq dövlət müəssisələrinin bir qismi işləməyib. Çünki məhdudiyyət tətbiq edilməsəydi, o zaman virusa yoluxanların və ölənlərin sayı kəskin arta bilərdi. Ona görə də tətbiq olunan məhdudiyyətlərlə əlaqədar olaraq dövlət bir sıra müəssisələrə maliyyə yardımı göstərdi. Nəzərə almaq lazımdır ki, Azərbaycanda pensiyaçıların da sayı çoxdur. Bütün bunlardan çıxış edərək büdcədən koronavirusla mübarizəyə bəlli vəsaitin ayrılması müsbət haldır. Bütün bunlar bir daha onu göstərir ki, Azərbaycan sosial dövlətdir. Dövlət əhalinin qayğısına qalır və onları çətin vəziyyətdə qoymur”.
İqtisadçı-alim onu da qeyd etdi ki, bütün bunlar pandemiyanın yaratdığı fəsadların yüngülləşdirilməsində mühüm rol oynadı.
Vidadi ORDAHALLI
