Özəl sektorumuz bu il investisiya layihələrinin maliyyələşdirilməsinə daha çox cəlb ediləcək - Prezident bunu hökumət üçün niyə vacib bildi...

Pərviz Heydərov: “Özəl sektoru investisiya layihələrinin maliyyələşdirilməsinə cəlb etmək o deməkdir ki...”

img

Nazirlər Kabineti Prezidentin tapşırıqları əsasında 2021-ci il üçün prioritetləri müəyyənləşdirib. Baş nazir Əli Əsədovun sədrliyilə Nazirlər Kabinetinin müşavirəsində Prezident İlham Əliyevin sədrliyilə 2020-ci ilin yekunlarına həsr olunmuş müşavirədə dövlət başçısı tərəfindən verilən tapşırıqların icrası və qarşıda duran vəzifələr müzakirə olunub.

 

Baş nazir Əli Əsədov qeyd edib ki, Prezidentin tapşırığına uyğun olaraq, işğaldan azad edilmiş ərazilər üzrə Strateji Fəaliyyət Planı hazırlanır və bütün ərazilərin və şəhərlərin bərpası vahid konsepsiya əsasında həyata keçiriləcək.

Baş nazir Prezidentin tapşırıqları əsasında növbəti il üçün müəyyənləşdirilmiş prioritetləri səsləndirib.

Həmin prioritetlərdən biri də Prezidentin tapşırığına uyğun olaraq, özəl sektorun investisiya layihələrinin maliyyələşdirilməsinə cəlb edilməsi ilə bağlıdır.

Qeyd edilib ki, dövlət-özəl tərəfdaşlığının təşviqi davam etdirilməli, prioritet sahələrə özəl investisiyaların cəlb edilməsi stimullaşdırılmalı, dövlət investisiya layihələrinin səmərəliliyi təhlil edilməlidir.

Özəl sektoru investisiya layihələrinin maliyyələşdirilməsinə cəlb edilməsi nə deməkdir və bunun əhəmiyyəti nə olacaq?

  • ...sahibkarlar tərəfindən də həmin ərazilərə investisiya qoyulmasının şahidi olaq”

Tanınmış iqtisadçı Pərviz Heydərov “Bakı-Xəbər”ə şərhində qeyd etdi ki, özəl sektorun bu proseslərdə maliyyələşdirməyə cəlb olunmasının mühüm əhəmiyyəti var: “Özəl sektoru investisiya layihələrinin maliyyələşdirilməsinə cəlb etmək o deməkdir ki,  iqtisadiyyata sərmayə qoyuluşunda sahibkarlar özləri də iştirak etsinlər. Bilirsiniz ki, Azərbaycanda indiyə qədər görülən bütün işlər bilavasitə dövlət investisiyaları hesabına olub, dövlət büdcəsindən ayrılan vəsaitlər hesabına həyata keçirilib. Təəssüflər olsun ki, indi də belədir. Bu sahədə özəl sektorun yaxından dövlətlə bərabər iştirakı istənilən səviyyədə deyil. Məsələn, ərazilərimiz düşmən işğalından azad edilib və indi dövlət büdcəsindən azad edilən ərazilərimizin bərpasına, səhv etmirəmsə, 2,2 milyard vəsait ayrılıb. Yəni dövlət pul qoyub azad edilmiş ərazilərimizdə bərpa, yenidənqurma işləri aparacaq. Bu prosesdə sahibkarlar da iştirak etməlidirlər. Yəni o ərazilərdə aparılacaq bərpa işlərində, müəyyən istehsal obyektlərinin yaradılmasında sahibkarlar da maliyyə qoyaraq dövlətlə bərabər iştirak etməlidirlər. Söhbət bundan gedir. Ölkə başçısı da keçirdiyi son müşavirələrin əksəriyyətində xüsusilə bu məsələyə ciddi şəkildə toxunaraq bildirib ki, dövlət başçısı olaraq sahibkarları ölkə iqtisadiyyatının inkişafında yaxından iştirak etməyə çağırır. Yəni investisiya proqramlarının maliyyələşdirilməsinə vəsait qoysunlar. Söhbət sahibkarların da infrastrukturların yaradılmasında, istehsal sahələrinin təşəkkül tapmasında və sairdə yaxından iştirak etməsindən gedir. Onsuz da dövlət üzərinə düşən vəzifəsini yerinə yetirir. Sahibkarın müəssisə açması, istehsalat sahəsi yaratması üçün müvafiq infrastruktur olmalıdır, həmin infrastruktur da dövlət tərəfindən yaradılıb. Bakı və digər mərkəzi şəhərlər öz yerində, baxın, rayonların hər birində də hər cür infrastruktur yaradılıb. Söhbət nədən gedir? Söhbət elektrik enerjisi, qaz və su ilə təminatdan gedir. Bütün bu işləri dövlət, hökumət büdcədən pul qoyaraq rayonlarımızda, bölgələrimizdə geniş şəkildə edib, edir və gələcəkdə də edəcək. Sahibkarın da vəzifəsi odur ki, müvafiq infrastruktur yaranandan sonra öz vəsaiti hesabına istehsalat sahəsi yaratsın və ora beş-on işçi cəlb etsin, hər hansı bir məhsul istehsal etsin, onun ölkədən kənara ixracına çalışsın. Söhbət ondan gedir ki, dövlətin ortaya qoyduğu investisiya proqramlarının icrasında sahibkarlar da yaxından iştirak etsinlər”.

Bunun üçün də sahibkarların stimulu olmalı olduğunu deyən P.Heydərovun fikrincə, sahibkarda stumul olmaqla yanaşı, onda savad da olmalıdır. “Sahibkarların bu məsələlərə yanaşmada həm ölkə qanunvericiliyinə yaxından bələdçiliyi, maliyyə resursları ilə işləməyə, bankdan pul götürüb iş görməyə hər cür imkanı olmalıdır. Bank yüksək faizlə kredit verirsə, sahibkarı da qınamaq olmaz. Əvvəla onun cibində o qədər pul yoxdur ki, zavod, fabrik açsın. Dünyanın heç bir sahibkarında elə imkan yoxdur. İstənilən sahibkar iş görəndə, istər-istəməz, borc götürür. Bank sektoru gərək sahibkarı stimullaşdırsın, verdiyi kreditin faizi aşağı olsun ki, sahibkarı investisiya proqramının maliyyələşdirilməsinə dəvət edəndə onlar da gedib kredit götürüb ölkə iqtisadiyyatına vəsait yatırsınlar. Yəni buna çox geniş kompleksli məsələ kimi baxmaq lazımdır”.

P.Heydərovun sözlərinə görə, sahibkarların investisiya qoyması üçün bank faizlərinin aşağı salınması, vergi qaydalarının yumşaldılması lazımdır. “Dövlət azad olunmuş ərazilərin bərpasına bu qədər vəsait qoyub. Ölkənin iri holdinq, şirkət sahibi olan insanlar da dövlətin qoyduğu qədər vəsait qoya bilməsələr də, heç olmasa onların hər biri 100, 200 milyon vəsait qoya bilərlər və Cəbrayılda, Füzulidə, Ağdamda və başqa rayonlarımızda 50-100 nəfər işçinin çalışa biləcəyi bir müəssisə açsınlar. Demək istəyirəm ki, investisiya layihələrinin maliyyələşdirilməsində özəl sektor da, sahibkarlar da yaxından iştirak etməlidirlər. Dövlət büdcəsindən ayrılan o vəsait tam vəsait deyil. Yaxşı olardı ki, dövlətin ayırdığı vəsaitin 10-da biri, 5-də biri qədər sahibkarlar tərəfindən də həmin ərazilərə investisiya qoyulmasının şahidi olaq. Yəni azad olunmuş ərazilərin bərpa prosesində özəl sektorun da iştirakını görək. Prezident bu yaxınlarda çıxışlarından birində bildirdi ki, torpaqlarımız işğalda olduğu dövrdə ərazilərimizdə ermənilər taxıl əkirmişlər, bu da ümumi Ermənistan ərazisindən əldə olunan taxıl tədarükündən dəfələrlə çox imiş. İşğaldan azad olunan ərazilərimiz bu kimi bir çox sahənin inkişafına çox böyük töhfə verə bilər. Ona görə sahibkarların ora vəsait qoyması, yönəltməsi çox yaxşı olardı. İstənilən sahibkar üçün Bakıda, Sumqayıtda, Gəncədə zavod, fabrik açmaqdansa, bu gün azad olunmuş ərazilərdə bu işi təşkil etmək daha sərfəlidir” - deyə P.Heydərov qeyd etdi.

İradə SARIYEVA

Son xəbərlər