Aprelin 1-nə Azərbaycanda fəaliyyəti aktiv olan xarici investisiyalı kommersiya qurumlarının sayı ötən ilin eyni dövrü ilə müqayisədə 1,5 dəfə çox olub. Bu, İqtisadiyyat Nazirliyi yanında Dövlət Vergi Xidmətinin yaydığı məlumatda qeyd olunur. Bildirilir ki, aprelin 1-nə qeydiyyatda olan xarici investisiyalı kommersiya hüquqi şəxslərin 18,8 faizi xarici hüquqi şəxslərin Azərbaycan Respublikasındakı nümayəndəliyi və ya filialı, 77,3 faizi məhdud məsuliyyətli cəmiyyət, 0,8 faizi səhmdar cəmiyyət, 0,2 faizi kooperativ və 2,8 faizi isə digər təşkilati-hüquqi formalarda olub.
Cari ilin mart ayında 173 xarici investisiyalı kommersiya hüquqi şəxs dövlət qeydiyyatından keçib. Bu isə keçən ilin eyni dövrü ilə müqayisədə 1,2 dəfə (137) çoxdur. Martda qeydiyyata alınan 173 xarici investisiyalı kommersiya qurumunun 170-nin fəaliyyəti aktiv olub, 3-nün fəaliyyəti dayandırılıb.
Qeyd edək ki, bu ilin martında dövlət qeydiyyatından keçmiş xarici investisiyalı kommersiya hüquqi şəxsin 36,4 faizi xidmət, 16,7 faizi ticarət, 8,6 faizi sənaye, 6,9 faizi tikinti, 2,3 faizi kənd təsərrüfatı, 1,1 faizi nəqliyyat, 2,8 faizi rabitə, 24,8 faizi digər sahədə fəaliyyət göstərir.
“Qeyri-neft sektoruna xarici investorların cəlbi üçün vergi və digər sahələrdə...”
İqtisadçı-ekspert Pərviz Heydərov bildirdi ki, investisiya mövzusu dünyada çox həssas hesab edilən bir mövzudur. Xüsusilə Azərbaycan kimi inkişaf etmək yoluna qədəm qoymuş ölkələr investisiya cəlbediciliyini artırmağa daha çox can atırlar. Çünki investisiyasız inkişaf mümkün deyil: “Azərbaycanın bugünkü inkişaf səviyyəsinə gəlib çıxmağına səbəb məhz xarici investisiyalar olub. On illər Azərbaycanda dövlət səviyyəsində mövcud investisiya mühitinin daha da yaxşılaşdırılması üçün xeyli iş görülür. Xüsusən də qeyri-neft sektoruna xarici investorların cəlbi üçün vergi və digər sahələrdə yumşaltmalar edilməkdə, güzəştli xarakter daşıyan addımlar atılmaqdadır. Qeyri-neft sektoruna xarici investisiya axınının artırılması üçün daha çox güzəştlər edilsin, hətta müəyyən bir müddət ərzində qeyri-neft sektoruna maliyyə yatıran xarici sahibkarlara vergi belə tətbiq edilməsin. Təxminən 3-5 il vaxt ərzində onlara tam azad fəaliyyət üçün şərait yaradılsın. Müxtəlif regionlarda azad iqtisadi zonalar yaradılsın. Elə bir şərait yaratmaq lazımdır ki, Azərbaycanda bazara girən sahibkar bilsin ki, 3 il ərzində ya vergidən tam azad olunacaq, ya da minimal məbləğdə vergi ödəyəcək. Qoy o sahibkar burada müvafiq infrastrukturu qursun, gəlirini götürsün, sonra isə biz gəlir götürərik”.
Günel CƏLİLOVA
