Yadigar Məmmədli: "Kimin bu yarışa necə yanaşmasından asılı olmayaraq, unutmaq lazım deyil ki, İslam Həmrəyliyi Oyunları beynəlxalq dərəcəli bir yarışdır"
Bakının ev sahibliyi etdiyi İslam Həmrəyliyi Oyunları artıq yekunlaşdı. İslam Oyunlarının sədası tək yerli mediadan deyil, eyni zamanda, xarici KİV-dən də gəldi. Dünya mediası İslam Həmrəyliyi Oyunlarının təşkilati işlərinin yüksək səviyyədə hazırlanması, yarışın açılış mərasimi, oyunların gedişi və digər məqamlar haqqında məqalələr dərc etdi.
Qeyd edək ki, İslam ölkələrinin bütün mətbuat orqanlarında Bakı Oyunlarının işıqlandırılmasına geniş yer verildi.
Səudiyyə Ərəbistanının "Ukaz" qəzeti və "okaz.com.sa" saytı "IV Bakı İslam Həmrəyliyi Oyunlarının əfsanəvi açılışı" başlığı adı altında yazı dərc edib.
İordaniyanın "Əl-Ray" qəzeti İslam Oyunları, burada iştirak edən iordaniyalı idmançılar və onların uğurları haqqında geniş yazı dərc edib.
Qətərin "Əl-Ərəm" nəşri müxtəlif qitələrdən idmançıların 20 idman növündə yarışması və Oyunlarda dövlətlərin iştirakı barədə ətraflı məlumat verib. Qəzet Azərbaycan Respublikasının Birinci vitse-prezidenti, IV İslam Həmrəyliyi Oyunlarının Təşkilat Komitəsinin sədri Mehriban Əliyevanın çıxışına böyük yer ayırıb.
Səudiyyə Ərəbistanında yerləşən "İslamic Solidarity Sports Federation" (İSSF) - İslam Həmrəyliyi İdman Federasiyası Oyunların bütün məlumatlarının davamlı olaraq canlı yayım vasitəsilə 58 ölkədə yayıldığını xəbər verib.
Birləşmiş Ərəb Əmirliyinin (BƏƏ) "Əl-bəyan", "Əl-Vatan", "Oman" qəzetləri və eyni adlı saytları, Yəmənin "Saba Net" informasiya agentliyi, Misirin məşhur "Əl-Əhram", "Əl-Cumhuriyyə" və digər ərəb ölkələrinin KİV-i bu mövzuda xəbərlər yayıb.
Onu da qeyd edək ki, tək İslam ölkələrinin mətbuatı deyil, eyni zamanda, Qərb mediası da Bakıda keçirilən İslam Oyunları haqqında məqalələr dərc edib.
İtaliyanın "Notizie Geopolitiche" portalında "Azərbaycan. İslam Həmrəyliyi Oyunları. Multikulturalizmin gücü" başlıqlı məqalə dərc olunub. Məqalədə göstərilir ki, IV İslam Həmrəyliyi Oyunları zamanı Xəzərdən başlayan su səyahəti çərçivəsində suyun müxtəlif regionlara aparılması simvolik olaraq Azərbaycan xalqının birliyini, habelə İslam ölkələrinin və İslam dəyərlərinin həmrəyliyini ifadə edir.
Rumıniyanın "Agerpres" milli xəbər agentliyinin saytında "Bakı-2017" barədə məqalə yerləşdirilib. Tək İslam ölkələrinin mediasının deyil, həmçinin, Avropa ölkələrinin KİV-inin də IV İslam Həmrəyliyi Oyunlarına yer ayırması sevindiricidir.
Ekspert Yadigar Məmmədli "Bakı-Xəbər"ə açıqlamasında qeyd etdi ki, İslam Həmrəyliyi Oyunları dünya ölkələrinin diqqətində olan bir yarışdır: "Kimin bu yarışa necə yanaşmasından asılı olmayaraq, unutmaq lazım deyil ki, İslam Həmrəyliyi Oyunları beynəlxalq dərəcəli bir yarışdır. Bu cür tədbirləri dünya KİV-i də böyük maraqla işıqlandırır. Ancaq burada bir məqam var. Qərəzli mövqe tutan ölkələr, güc mərkəzləri var ki, onlar bu məsələyə öz kontekstləri çərçivəsində yanaşır. Normal media isə İslamiadanın təşkilatçılığından tutmuş, yarışlara qədər işıqlandırır".
Həmsöhbətimiz onu da vurğuladı ki, artıq Azərbaycan mötəbər idman yarışlarının keçirilməsi üzrə inamla öndə irəliləyir: "Dünya səviyyəli idman yarışlarının keçirilməsi ölkəmizin imicini yüksəldir. Həmçinin, bu cür yarışların keçirilməsi, təşkili artıq bizim üçün adi hala çevrilib. Artıq bu formatda beynəlxalq əhəmiyyətli idman yarışları keçirilib. Ümid edirik ki, bundan da üstün idman yarışlarına Azərbaycan ev sahibliyi edəcək".
Günel CƏLİLOVA
