Elxan Qarayev: "İdmanla peşəkar səviyyədə məşğul olan insanların əksəriyyəti gəncdir, bu o deməkdir ki, idmanın kütləviliyi həm də gənclərin inkişafı yönündə görülən işdir"
10 gündən artıqdır IV İslam Həmrəyliyi Oyunlarına ev sahibliyi edirik. Bu Oyunlar həm dünya, həm də İslam aləmi üçün çox önəmli idman yarışlarından biridir. Bu Oyunların Azərbaycanda keçirilməsi bir daha onu göstərir ki, ölkəmiz dünya miqyasında böyük nüfuza malikdir. İslamiada bütün müsəlman ölkələri üçün idman bayramıdır desək, yəqin ki, yanılmarıq. İslam Oyunlarının keçirilməsi, eyni zamanda, İslam ölkələrinin bir-birinə yaxınlaşmasına yardımçı olacaq. Oyunlar başlayan gündən etibarən idmançılarımız ölkəmizi layiqincə təmsil edir. Sevindirici haldır ki, qazanılan medalların sayı günü-gündən artır.
Milli Olimpiya Komitəsinin (MOK) vitse-prezidenti Çingiz Hüseynzadə jurnalistlərə açıqlamasında deyib ki,
IV İslam Həmrəyliyi Oyunlarında idmançılarımızın uğuru Azərbaycanın idman tarixinə qızıl hərflərlə yazılacaq. O qeyd edib ki, yarışlarda əhalisinin sayı Azərbaycandan çox olan ölkələr təmsil olunur: "Ancaq Azərbaycan uğurlarına görə siyahıda öndədir. Bu amil, eləcə də IV İslam Həmrəyliyi Oyunları Azərbaycanın böyük idman ölkəsi olduğunu bir daha sübut edir".
Azərbaycan idmançılarının uğurlarının səbəbi nə ilə bağlıdır? Mövzu ilə əlaqədar mütəxəssisə müraciət etdik.
Qaydasız döyüş üzrə məşqçi Elxan Qarayev "Bakı-Xəbər"ə açıqlamasında qeyd etdi ki, idmançılarımızın uğuru gözlənilən idi: "Çünki onlar bu yarışa böyük həvəslə hazırlaşıb. Həmçinin, nəzərə almaq lazımdır ki, idmanla peşəkar səviyyədə məşğul olan insanların əksəriyyəti gəncdir, bu o deməkdir ki, idmanın kütləviliyi həm də gənclərin inkişafı yönündə görülən işdir. Bilirsiniz ki, ölkəmizdə gənclərin inkişafına dair proqramlarda idmanın inkişafı prioritet olaraq müəyyənləşdirilir. Gənclər arasında maarifləndirmə işlərinin aparılması, onların idmana cəlb olunması bu məsələdə xüsusi əhəmiyyət kəsb edir. Çünki əsas məqsəd gənclərin sağlamlığının qorunması və buna xidmət edən təşviqedici və maarifləndirmə tədbirlərinin həyata keçirilməsidir. Unutmayaq ki, sağlam gənclik həm də sağlam gələcək deməkdir. Ona görə də ölkə rəhbərliyi tərəfindən idmanın inkişafı hər zaman diqqət mərkəzindədir.
Bilirsiniz ki, idmançılarımızın da mütləq əksəriyyəti gəncdir. Respublikamızda müasir idman infrastrukturu yaradılıb və gənclərimiz bu imkanlardan geniş şəkildə bəhrələnir. IV İslam Həmrəyliyi Oyunlarında iştirak edən idmançılarımız öz sözünü deyir və deyəcəklər".
Günel CƏLİLOVA
