Ceyhun Məmmədov: "Bu səbəbdən də Oyunların təşkilatçılarına deyilən məsələ ilə bağlı hər hansı bir irad bildirilə bilməz"
Bakıda keçirilən İslam Həmrəyliyi Oyunlarında kamerunlu ağır atletika təmsilçisi performansı ilə deyil, hərəkəti ilə diqqət çəkib. İdmançı 136 kq çəkini qaldırmağa nail olduqdan sonra xaç çəkib. Bu isə sosial şəbəkələrdə təəccüblə qarşılanıb. Hətta idmançının bu hərəkətinə görə yarışın təşkilatçılarına irad bildirənlər də tapılır. Onların arqumentlərinə görə, İslamiadada xristian dininə aid hansısa ritualın icra edilməsi yolverilməzdir.
Yəqin ki, bunu iddia edənlər İslamiadanın əsl mahiyyətindən xəbərsizdir. Çünki yarışın fəlsəfəsi bundan ibarətdir ki, yalnız müsəlman ölkələrini təmsil edən dövlətlər iştirak edə bilər. Həmin komandaların tərkibindəki idmançıların isə hansı dini inanca etiqad etməsi önəmli deyil.
İslamiadada xaç çəkmə ritualını yerinə yetirən idmançının qınanılması doğrudurmu?
İdman eksperti Ceyhun Məmmədov bunu doğru saymır: "İdman sülh, mehribanlıq yaratmaq missiyasını həyata keçirir. Sağlamlıqla yanaşı, bu amillər də artıq idmanın ayrılmaz parçasına və vacib atributuna çevrilib. İdman yarışlarında dini inanc məsələsinə heç vaxt önəm verilməyib. Çünki burada idmançının bacaracağı və göstərdiyi nəticə önəmlidir. Hətta idman yarışlarının qaydalarına görə, tamaşaçılar tərəfindən dini, irqi, milli ayrıseçkiliyə aid şüarlar səsləndirildiyi təqdirdə, ev sahibi olan komandaya cərimələr kəsilir, xəbərdarlıq edilir. Əksinə, idman yarışlarını keçirməklə ölkələr arasında olan ziddiyyətləri bir qədər yumşaltmağı hədəfləyir. Buna idman diplomatiyası da deyilir. Əksər hallarda bu nəticə də verib. Məsələn, tarixdə belə misallar çoxdur. Almaniyanın futbol yığması İkinci Dünya Müharibəsi dönəmində müharibə etdiyi ölkələrlə oyunlar keçirirdi. Çox vaxt idmanı bu cür ziddiyyətlərdən uzaq saxlamaq istəyirlər. İslamiadada iştirak edən həmin idmançının qınağa çəkilməsini doğru saymıram. İslam Oyunlarının qaydalarında belə bir şərt yoxdur ki, idmançı mütləq islam etiqadlı olmalıdır. Burada vacib şərt ölkənin müsəlman standartlarına cavab verməsidir. Bu səbəbdən də Oyunların təşkilatçılarına deyilən məsələ ilə bağlı hər hansı bir irad bildirilə bilməz. İslamiadada ən çox medal qazanan ölkələrdən biri kimi öz yığmamızın tərkibinə diqqət edək. Heç də hamısı azərbaycanlı və ya müsəlman deyil. İndi buna görə bizi qınamalıdırlar? Gəlin idmanı dini dözümsüzlük və ya hansısa müstəvidə olan ayrıseçkiliklərə çəkməyək. Azərbaycanın hazırda ev sahibliyi etdiyi yarışların ən böyük qayəsi elə dinlər, millətlər arasında sülh, əminamanlığı təbliğ etməyə, sağlam həyat tərzini aşılamağa hesablanıb".
Məhəmmədəli QƏRİBLİ
