Ceyhun Məmmədov: "Digər səbəb isə son 10 il ərzində Azərbaycanda idmana göstərilən dövlət qayğısı və tikilən müasir idman qurğularıdır"
Bakıda keçirilən IV İslam Həmrəyliyi Oyunlarında Azərbaycan milli komandası gözəl nəticələr göstərir. Yığmamız hər ötən gün daha çox medal qazanır. İdmançılarımız idmanın bütün növləri üzrə yüksək məharət göstərir
İki dəfə çempionluq tituluna yiyələnən Marina Durunda (bədii gimnastika, halqa və lent), həmçinin, idman gimnastikası üzrə qadınlardan ibarət yığma (Yuliya İnşına, Marina Nekrasova, Mariya Smirnova, Yekaterina Tişkova), Ruslan Lunyev (güllə atıcılığı, tapança, 25 m), Roman Heydərov (karate, kata), Məmmədəli Mehdiyev (cüdo, 90 kq), Maksim Şemberov (üzgüçülük, sərbəst üsulla, 1500 metr), qadınlardan ibarət həndbol yığması, Elxan Məmmədov (cüdo, 100 kq), İrina Zaretska (karate, 68 kq), Ayxan Mamayev (karate, 84 kq), Jalə Piriyeva (bədii gimnastika, top), Elçin Talıbov (paracüdo, 66 kq) və Ramil Qasımov (paracüdo, 73 kq) fəxri kürsünün ən yüksək pilləsinə qalxıb.
Gümüş medala isə idman gimnastikası üzrə kişilərdən ibarət yığma (Murad Ağarzayev, Timur Bayramov, Bense Talas), Elmar Qasımov (cüdo, 100 kq), İrina Kindzerska (cüdo, +78 kq), Marina Durunda (bədii gimnastika, gürzlər), Fəridə Əliyeva (karate, +68 kq), Jalə Piriyeva (bədii gimnastika, lent), Bayram Mustafayev (paracüdo, 66 kq), Kənan Abdulxanlı (paracüdo, +100 kq) yiyələnib.
Jalə Piriyeva (bədii gimnastika, halqa), Marina Durunda (bədii gimnastika, top), Asiman Qurbanlı (cüdo, +84 kq), Natiq Talıbov (paracüdo, 73 kq), Rövşən Səfərov (paracüdo, 90 kq), İlham Zəkiyev (paracüdo, +100 kq) İslamiadanın bürünc mükafatına sahib olub.
Bununla da medallarımızın ümumi sayı 50-yə çatıb. Bunun 24-ü qızıl, 17-si gümüş, 9-u bürüncdür (medalların sayı dəyişə bilər - M.Q). Yığmamız bu göstərici ilə İslam Həmrəyliyi Oyunlarının medal sıralamasında 1-ci pillədə qərarlaşıb.
Ümumilikdə isə, yarışın 3-cü günündə 39 dəst medal sahibini tapıb. Arxada qalan müddətdə isə 69 dəst mükafatçı müəyyənləşib.
Qeyd edək ki, 24 ölkə medal qazanmağı bacarıb. Çempionluq sevincini yaşayan ölkələrin sayı isə 13-dür.
Diqətçəkən ən vacib məqam bundan ibarətdir ki, Azərbaycan bundan əvvəl keçirilən islamiadalardakından qat-qat güclü nəticə ortaya qoyur. Bu nəticə nə ilə bağlıdır?
İdman eksperti Ceyhun Məmmədov qəzetimizə açıqlamasında bildirdi ki, Azərbaycan yığmasının nəticəsi gözlənildiyindən də artıqdır. Təbii ki, bu bizi dərindən sevindirir. Əvvəlki İslam Oyunları ilə müqayisədə belə vəziyyətin yaranmasının bir neçə səbəbi var. Əvvəla burada ev sahibliyi önəmli rol oynayır. Çünki idmanda ev sahibliyi komanda üçün əlavə avantaj anlamına gəlir. İkinci başlıca səbəb isə son 10 il ərzində Azərbaycanda idmana göstərilən dövlət qayğısı və tikilən müasir idman qurğularıdır. Görürsünüz ki, istənilən yarışda yer qazanan idmançıya böyük məbləğdə pul mükafatını Azərbaycan verir. Başqa bir cəhət isə ölkəmizə cəlb edilən legionerlərin çox olmasıdır. Elə idman növləri vardı ki, əvəlki yarışlarda Azərbaycan həmin növlərdə təmsil olunmayıb. Hazırda, demək olar ki, bütün idman növlərində idmançılarımız ölkənin şərəfini qoruyur. Yəqin ki, növbəti İslamiadada legionerlərin sayında bir az azalma olar və onları yerli idmançılar əvəz edər. Bu da bizim üçün davamlı inkişaf anlamına gələ bilər. Çünki idmana göstərilən yüksək qayğı gənclərimizi bu sahəyə meyl etməyə həvəsləndirir".
Məhəmmədəli QƏRİBLİ
