Daxili İşlər Nazirliyinin mətbuat xidmətindən baki-xeber.com-a verilən məlumata görə, Nazirliyin Daxili Qoşunlarında nümunəvi xidməti və nizam-intizamı ilə seçilən hərbi qulluqçularımızdan biri də Bakı şəhərində yerləşən "N" saylı hərbi hissədə xidmət edən gizir Günay Əliyevadır. Xidməti vəzifə borclarına məsuliyyətlə yanaşan qadın hərbi qulluqçumuz eyni zamanda Daxili Qoşunları beynəlxalq idman yarışlarında yüksək peşəkarlıqla təmsil edir.
Artıq 12 ildir ki, idmanın Karate növü ilə məşğul olan hərbi qulluqçumuz "birinci dan qara kəmər" ustasıdır. 2008-ci ildə Asiya çempionu adını qazanan idmançı 2011-ci ildə Gürcüstanda keçirilən kinq-boksinq üzrə çempionatda Zaqafqaziya çempionu adını, həmin ildə Ukraynada keçirilən Dünya çempionatında isə 3-cü yeri qazanıb.
Növbəti dəfə 2015-ci ildə Avropa çempionu adını qazanan Günay Əliyeva 2017-ci il mayın 4-dən 7-nə kimi Ukraynanın Xarkov şəhərində təşkil olunmuş Kempo Karate və Kobudo üzrə dünya çempionatının qalibi kimi tanınıb.
Hərbi qulluqçumuzun nailiyyətləri hər birimizi sevindirir. Azərbaycan bayrağını beynəlxalq yarışlarda şərəflə dalğalandıran, təmsil etdiyi qurumu öz uğurları ilə sevindirən gizir G.Əliyevaya yeni-yeni qələbələr arzu edirik!
