Gürcüstanda keçirilən Qafqaz çempionatında cüdoçularımız uğurla çıxış edib. DİN-in mətbuat xidmətindən "Bakı-Xəbər"ə verilən məlumata görə, peşəkarların yarışında İran, Gürcüstan, Dağıstan, Qazaxıstan və Ukraynadan olan idmançılar da mübarizə aparıb.
Ümumi komanda hesabında ilk yerin sahibi olan idmançılarımız bayrağımızı ucalara qaldırmaqla, himnimizin yüksək trubunalardan səsləndirilməsinə nail olmaqla bir daha sübut ediblər ki, idmanın ümumxalq hərakatına çevirilməsi üçün ölkəmizdə hər cür şərait yaradılıb.
DİN Baş İctimai Təhlükəsizlik İdarəsinin Diplomatik Nümayəndəliklərin Mühafizəsi üzrə Əlahiddə Polis Taborunun əməkdaşı, polis serjantı Rəşad Vəliyev həmin çempionatda ölkəmizi idmanın iki növündə-Qreplinq və MMA Qreplinqdə təmsil edib. O, ilk qarşılaşmada İran idmançısı Məhəmməd Purdarını məğlub edərək finala çıxıb, finalda isə yerli idmançı Soso Duradzeyə də qalib gələrək Zaqafqaziya çempionu adını qazanıb.
R.Vəliyev MMA Qreplinqdə Dağıstan idmançısı Zakarya Kadırova qalib gəlib, finalda İran idmançısı ilə qarşılaşıb. O, 3-1 hesabı ilə rəqibinə qalib gəlsə də aldığı zədə ucbatından hakimlərin qərarı ilə görüş yarıda saxlanıb və İran idmançısına texniki qələbə verilib.
Həmkarımız çempionatdan bir qızıl və bir gümüş medalla ayrılıb.
Rəşadı sentyabar ayında Monteneqroda keçirilən dünya çempionatı gözləyir.
