Maarif Hüseynov: "İslam Həmrəyliyi Oyunlarının simvolunun Qarabağ atı olması o deməkdir ki, Qarabağ atları öz diyarına geri qayıdacaq"
Təranə Xudabaxşiyeva: "İslam Oyunları maskodlarının da Azərbaycanın simvollarından biri olacağını..."
Bu il paytaxt Bakımız IV İslam Həmrəyliyi Oyunlarına ev sahibliyi edəcək. Azərbaycanda dəfələrlə beynəlxalq əhəmiyyətli idman yarışları keçirilib. Onlardan "Bakı-2015" Avropa Oyunlarını, "Formula 1" və digərlərini misal göstərmək olar.
Necə ki, "Bakı-2015" Avropa Oyunları zamanı bütün dünyanın diqqəti Azərbaycanda idisə, İslam Həmrəyliyi Oyunlarında da belə olacağı istisna olunmur.
Məlumat üçün bildirək ki, IV İslam Həmrəyliyi Oyunları Əməliyyat Komitəsi fevralın 13-də "Bakı-2017"nin rəsmi talismanlarını ictimaiyyətə təqdim edib. Azərbaycanın milli sərvəti, gözəlliyi ilə göz oxşayan Qarabağ atları IV İslam Həmrəyliyi Oyunlarının talismanları olacaq. İncəliyi və cəsurluğu özündə əks etdirən Qarabağ atları yarışın təbliğində əhəmiyyətli rol oynamaqla yanaşı, "Bakı-2017"nin simaları olacaq.
"İncə" zəriflik və gözəllik nümunəsi olmaqla yanaşı, incəliyi, məlahəti ilə diqqəti cəlb edir, özündə milliliyi və müasirliyi qovuşdurur.
Məharətli, mərd və məqsədyönlü "Cəsur" digər Qarabağ atları kimi özünə əminliyi və sərbəstliyi ilə seçilir. Məqsədlərinə nail olmaq üçün heç bir çətinlikdən qorxmayan, iradəli və əzmkar olan "Cəsur" mehribanlığı, hər kəsə sevgi və diqqəti ilə də ön sıralardadır.
IV İslam Həmrəyliyi Oyunlarının talismanları olan "İncə" və "Cəsur" Oyunlardan əvvəl və yarışlar zamanı vətəndaşlarımızı yarışın bir parçası olmağa ruhlandıracaq, ölkəmizin bütün ərazisində əsl idman bayramı əhval-ruhiyyəsi yaradacaqlar.
Xatırladaq ki, "Bakı-2015" İlk Avropa Oyunlarının simvolu nar və ceyran idi. Ceyran və nar ölkənin qürurlu tarixini və ümidverici gələcəyini əks etdirir. Ceyran ölkədə təbii gözəlliyin, zərifliyin və saflığın simvolu və Azərbaycanda qorunan heyvan növlərindən biridir. Nar günəşi sevən, Göyçay rayonunda bitən meyvədir.
Qarabağ atlarının IV İslam Həmrəyliyi Oyunlarının simvolu olması barədə fikir bildirən Ağdam Atçılıq Zavodunun direktoru Maarif Hüseynov "Bakı-Xəbər"ə açıqlamasında qeyd etdi ki, İslam Həmrəyliyi Oyunlarının Qarabağ atları ilə açılması Qarabağın Azərbaycanın qüruru olmasının göstəricisidir: "Tarixən atın murad olduğu deyilib. Doğrudan da at muraddır. İslam Həmrəyliyi Oyunlarının simvolunun Qarabağ atı olması o deməkdir ki, Qarabağ atları öz diyarına geri qayıdacaq. Unutmaq lazım deyil ki, at qəhrəmanlıq nümunəsidir".
Onun sözlərinə görə, ölkəmizin nadir sərvəti sayılan bu atların beynəlxalq əhəmiyyətli tədbirlərin talismanı olması bu gün bizim üçün vacibdir.
İdman jurnalisti Təranə Xudabaxşiyeva bizimlə söhbətində qeyd etdi ki, İslam Oyunları maskodlarının da Azərbaycanın simvollarından biri olacağını təxmin etmək elə də çətin deyildi: "Sadəcə bir məsələ var ki, şəxsən mənim üçün uğurlu maskot deyillər. Xüsusilə "Cəsur" adlı maskod daha uğursuzdur. Məncə Qarabağ atlarını daha gözəl milli geyimlərdə, daha yaxşı şəkildə təqdim etmək olardı. Eyni zamanda bir Qarabağ atı və digərini başqa simvollardan biri ilə təqdim etmək də pis olmazdı. Yenə də xeyirli olsun".
Günel CƏLİLOVA
